Тадбиркорлик фаолияти иқтисодиётимиз таянчларидан бири ҳисобланиб, уларнинг фаолиятини ҳимоя қилиш бугунги куннинг энг долзарб вазифаларидан бири саналади.
Бу борада Андижон вилоят адлия бошқармаси томонидан ҳам ижобий ишлар амалга ошириб келинмоқда. Жумладан, тадбиркорлар ҳуқуқларини ҳимоя қилиш бўлими томонидан 2014 йил давомида 70 дан ортиқ маҳаллий давлат ҳокимияти органлари ва назорат қилувчи органларда ўрганишлар ўтказилиб, мазкур ўрганишларда 3 мингдан зиёд қонунбузилиш ҳолатлари аниқланди.
Улар юзасидан тадбиркорлар манфаатини кўзлаб 137 та тақдимнома, 167 та огоҳнома ва кўрсатма, судларга тадбиркорлар фойдасига 2 миллиард сўмга яқин пул маблағини ундириш ҳақида 71 та даъво ариза киритилди.
Қўлланилган таъсир чоралари натижасида тадбиркорлар манфаатига зид равишда қабул қилинган 58 та қарор бекор қилинди, 105 нафар мансабдор шахс интизомий жазога тортилди, 18 нафар мансабдор шахс эса эгаллаб турган лавозимидан озод этилди.
Бундан ташқари, бошқарма томонидан 2014 йил давомида 798 нафар тадбиркорлик субъектининг текширишларни рўйхатга олиш китоби мониторинг қилинганда 339 та қонунбузилиш ҳолати аниқланди. Мазкур ҳолат юзасидан 38 та тақдимнома киритилиб, 17 нафар масъул мансабдор шахс интизомий жавобгарликка тортилди.
Шунингдек, АТБ “Агробанк” Шаҳрихон туман филиалида туман давлат солиқ идораси ходимлари томонидан кичик тадбиркорлик субъектларининг ҳисоботларини қабул қилишда бекор қилинган 2-а солиқ ҳисоботи олинганлиги аниқланди ва Шаҳрихон туман ДСИга тақдимнома киритилиб, туман ДСИ ходимларидан 2 нафарига “ҳайфсан” интизомий жазо чораси қўлланилди.
Хулоса қилиб айтганда, республикамизда мазкур соҳада олиб борилаётган ишлар, яъни кичик бизнес ва хусусий тадбиркорлик субъектларининг ривожланиб бориши жараёнида уларнинг бузилган ҳуқуқларини ҳимоя қилиш, қўллаб-қувватлаш, ҳуқуқий ёрдам кўрсатиш асосий вазифалардан бири бўлиб қолаверади.
Муҳаммадбобур Каримов, Андижон вилоят адлия бошқармаси масъул ходими