11

Тадбиркорга ғов бўлмангу қонун ҳимоясида

Маълумки, тадбиркорлик фаолияти иқтисодиётимиз таянчларидан биридир. Шу боис тадбиркорлар фаолиятини ҳимоя қилиш бугунги куннинг долзарб вазифаларидан саналади.

Андижон вилоят адлия бошқармасининг тадбиркорлар ҳуқуқларини ҳимоя қилиш бўлимига жорий йилнинг 9 ойи давомида тадбиркорлик субъектларидан 85 та ариза ва шикоят келиб тушган бўлиб, 43 та мурожаатнинг ижроси қаноатлантирилган.

Ҳукумат порталига 33 та мурожаат тушган, 16 та мурожаат ижроси юзасидан бевосита жойига чиқилиб ўрганилган ва натижасига кўра, 12 та мурожаат ижроси қаноатлантирилган.

Масалан, вилоят адлия бошқармасига Избоскан туманида фаолият олиб бораётган “Жамшидбек Асадбек Орзуси” оилавий корхонаси раҳбари мурожаат қилиб, ТИФ “Миллийбанк” Избоскан туман филиали ходимлари хатти-ҳаракатларидан норози бўлиб қилган мурожаати ўрганиб чиқилиб, ўрганиш натижаларига кўра, вилоят прокуратурасига масъул ходимлар хатти-ҳаракатларига нисбатан ҳуқуқий баҳо бериш учун киритилган таклифга биноан тадбиркорга банк муассасасидан 1 миллион 818 минг сўм пул маблағи ундириб берилди.

Ёки Андижон туманида фаолият кўрсатаётган “Самара Салт Гроуп” оилавий корхонаси раҳбарининг аризасида АТБ “Микрокредитбанк” Куйганёр бўлими томонидан тадбиркорнинг пул маблағлари нотўғри сарфланганлиги баён қи­линган. Мазкур мурожаат ҳам ўрганилгач, натижасига кўра, банк устав капиталининг 0.01 фоиз миқдорида жарима 
ва ноқонуний ўтказилган 25 миллион сўм пул маблағини қайтариш юзасидан вилоят хўжалик судига даъво ариза киритилиб, суднинг 2015 йил 
17 сентябрдаги 17-1503/12786-сонли ҳал қилув қарорига асосан АТБ “Микрокредитбанк” Куйганёр филиали ҳисобидан тадбиркор фойдасига асосий қарз ва 2.932.920 сўм жарима ундириб берилди.

Ҳозирда тадбиркорлик субъектларининг бузилган ҳуқуқларини тезкорлик билан аниқлаш, уларга ёрдам кўрсатишда адлия бошқармасининг “Ишонч телефони” ҳам муҳим ўрин тутмоқда.

Жумладан, “Ишонч телефони”га Олтинкўл туманида фаолият олиб бораётган “Бахтиёр Умид Юлдузи” МЧЖ раҳбари мурожаат қилиб, АТБ “Микрокредитбанк” Олтинкўл туман филиали томонидан кредит маблағи ажратилмаётганлигини билдирган. Мазкур мурожаат ўрганиб чиқилиб, ўрганиш натижасига кўра, тадбиркорга кредит шартномасига асосан 
11 миллион сўм миқдоридаги кредит пул маблағи ажратиб берилди.

Тадбиркорликка тўсиқ бўлаётган энг катта муаммо­лардан бири бу тадбиркорлик фаолиятига асоссиз аралашув ҳисобланади. Бунинг олдини олиш, тадбиркорларнинг қонуний ҳуқуқ ва манфаатларини ҳимоя қилиш борасида адлия бош­қармаси томонидан қатор ишлар амалга оширилди.

Хусусан, Адлия бошқармаси ҳамда вилоят ҳокимлиги билан ҳамкорликда тадбиркорликни ривожлантиришнинг самарадорлигини ошириш, қабул қилинган қонун ва қонуности ҳужжатларининг амалда тўғри татбиқ этилишини таъминлаш, кенг жамоатчиликка унинг мазмун ва моҳиятини етказиш мақсадида туманларда 10 дан зиёд семинар ўтказилди, тадбиркорларга ҳуқуқий кўмаклар берилди.

М.Ахматохунов, Андижон вилоят адлия бошқармаси масъул ходими