24

Фермер хўжаликлари манфаати суд қарорлари асосида ҳимоя қилинмоқда

Андижон вилоят адлия бошқармаси томонидан 2015 йилнинг 9 ойи давомида фермер хўжаликларининг ҳуқуқларини ҳимоя қилишда муайян ишлар амалга оширилди.

Хусусан, шартномавий муносабатлардаги қонунбузилиш ҳолатларига нисбатан мансабдор шахсларнинг масъулиятини ошириш мақсадида тегишли идораларга 70 та тақдимнома, 5 та жиноий таклиф, 17 та маъмурий баённома, 245 та огоҳнома, фермер хўжаликлари манфаатида 513 та даъво ариза киритилди.

Қўлланилган таъсир чоралари натижасида 83 нафар ходимга нисбатан интизомий жазо чораси қўлланилди, шундан 12 нафар мансабдор шахс эгаллаб турган лавозимидан четлаштирилган, тақдимномалар асосида фермер хўжаликларига 10 миллиард сўмдан зиёд маблағлар тўлаб берилган, 17 нафар мансабдор шахс маъмурий жавобгарликка тортилди, 2 нафарига эса жиноий жавобгарлик масаласи кўрилган ва киритилган даъво аризаларнинг 501 таси, яъни 4 миллиард 518 миллион сўм ундирувга қаратилиб, ҳал қилув қарорлари қабул қилинган.

Жумладан, бошқармага Пахтаобод туманида жойлашган “Шоядбек ота” фермер хўжалиги раҳбари У.Шоядбеков 2015 йил 10 августда Андижон туманида жойлашган “Андижон-1” пахта тозалаш АЖдан 2014 йил ҳосили учун 90 фоизлик тўловлар амалга оширилмаётганлигидан норози бўлиб мурожаат қилган. Ҳолат юзасидан тегишли тартибда ўрганиш ўтказилиб, вилоят хўжалик судига фермер хўжалиги манфаатини кўзлаб 20.308.073 сўм асосий қарз ва 2.844.597 сўм пеня ундириш учун даъво ариза киритилди. Суднинг ҳал қилув қарорига асосан 20.308.073 сўм асосий қарз ҳамда 1.500.000 сўм пеня ундириш белгиланди.

Шунингдек, Андижон туманида жойлашган “Айрончи бегойим” фермер хўжалиги раҳбарининг 2015 йил 28 июлдаги АТБ “Микрокредитбанк” Куйган-ёр филиали томонидан 60 миллион сўм миқдоридаги кредит ажратилмаётганлигидан норози бўлиб қилган мурожаати бошқарма ходимлари аралашуви билан ижобий ҳал қилиниб, мурожаатда кўрсатилган кредит ажратиб берилган. Мазкур ҳолат хўжалик раҳбарининг 2015 йил 4 августдаги аризаси билан тасдиқланган.

Шунингдек, жорий йилнинг 1 июнь санасида Ўзбекистон Республикаси Қиш­лоқ ва сув хўжалиги вазирлиги қошидаги Дон ва дуккакли дон экинлари илмий тадқиқот институти ректори Р.Сиддиқов бошқарманинг “Ишонч телефони”га мурожаат қи­либ, Андижон шаҳридаги “Андижондонмаҳсулот” АЖ томонидан тўловлар амалга оширилмаётганлигидан норози бўлиб мурожаат қилган. Ўрганиш жараёнида Президентимизнинг 2011 йил 27 сентябрдаги “2012 йил ҳосили учун кузги бошоқли дон экинларини экиш, навларни жойлаштириш ва харид қилишнинг ташкилий чора-тадбирлари тўғрисида”ги Қарорига асосан, 2012 йил ҳосилидан бошлаб “Дон ва дуккакли дон экинлари илмий тад­қиқот институти ва унинг филиалларига, уруғчилик ҳамда бошқа хўжаликлардан давлат ресурсига харид қилинадиган уруғлик дон учун нав устамаларидан 3 фоизгача ажратиш тартиби тўғрисида”ги Низомга асосан “Андижондонмаҳсулот” АЖ қабул қи­либ олинган уруғлик дон ҳисоби бўйича бериладиган устамалардан 3 фоизлик ажратмалар ажратилиши лозим бўлиб келган. 2013-2014 йиллар давомида “Андижондонмаҳсулот” АЖ томонидан жами 443.968.200 сўмлик тўловлар ажратилмаганлиги аниқланди.

Ушбу ҳолат юзасидан вилоят хўжалик судига тадқиқот институти манфаатини кўзлаб даъво ариза киритилди.

Суднинг ҳал қилув қарорига асосан Дон ва дуккакли дон экинлари илмий тадқиқот институти фойдасига 443.968.200 сўмлик ажратмалар ундирилиши белгиланди.

Л.Турдиқулов, Андижон вилоят адлия бошқармаси масъул ходими