Ноқонуний қарор бекор қилинди

Маълумки, бугунги кунда кичик бизнес ва хусусий тадбиркорлик фаолияти мамлакатимиз иқтисодий қудратининг янада юксалишида муҳим аҳамият касб этмоқда. Шу боис тадбиркорлар, кичик бизнес ва хусусий субъектлари фаолиятини ҳимоя қилиш бугунги куннинг долзарб вазифаларидан бирига айланмоқда. Муҳтарам юртбошимиз ташаббуси билан сўнги йилларда тадбиркорлик субъектлари фаолиятини янада ривожлантириш улар фаолиятда юзага келаётган муаммо ва тўсиқларни бартараф қилиш бўйича бир қанча қонун ва қонун ости ҳужжатлар ишлаб чиқилиб, амалиётга тадбиқ қилинди.

Хусусан, 2012 йилда “Тадбиркорлик фаолияти эркинлигининг кафолатлари тўғрисида”ги Қонуннинг янги таҳрири ва “Оилавий тадбиркорлик тўғрисида”ги Қонунларнинг қабул қилиниши тадбиркорлик субъектларига қатор имтиёз ва имкониятлар эшигини очди десак муболаға бўлмайди.

Шунингдек, кичик бизнес ва хусусий тадбиркорлик соҳасидаги қонун ва қонун ости ҳужжатлар ижроси ва уларни бажарилиши юзасидан назоратни таъминлаш ҳамда тадбиркорларга ҳуқуқий ёрдам бериш ва уларнинг фаолиятига ноқонуний аралашишларнинг олдини олиш мақсадида Андижон вилоят адлия бошқармаси томонидан кенг кўламли ишлар амалга оширилмоқда.

Масалан, Андижон вилоят адлия бошқармасининг “Ишонч телефони”га Андижон шаҳрида фаолият олиб бораётган “Самарбону элит” МЧЖ раҳбари ОАТБ “Қишлоқ қурилиш банк” вилоят минтақавий фаилиалидан кредит ажратилмаётганлигидан норози бўлиб мурожаат қилган. Ўрганиш натижасида жамият раҳбари 2013 йил 24 январда ушбу банкка аҳолига импорт ўрнини босувчи макарон маҳсулотларини етказиб бериш мақсадида ишлаб чиқариш цехини ишга тушуриш учун кредит олишни мақсад қилиб, мурожаат қилган. Ўз навбатида кредит олиш учун банк ходимлари томонидан тақдим қилинган ҳужжатлар жамият раҳбари томонидан таъминлаб берилган бўлсада, турли баҳоналар билан банк томонидан 2013 йилнинг 19 февралига қадар кредит ажратилмаганлиги маълум бўлди.

Мазкур ҳолат юзасидан адлия бошқармаси томонидан ОАТБ “Қишлоқ қурилиш банк” вилоят минтақавий фаилиалига тақдимнома киритилиб, жамиятга 200 млн сўм миқдорида кредит ажратиб берилиши таъминланди.

Бошқарма томонидан текширишларни рўйхатга олиш китобининг шакли ва тўлдириш тартибини тасдиқлаш, тадбиркорлик субъектлари ўртасида унинг тарқатилишини таъминлаш ва уни тўлдириш тартибига риоя қилинаётганлиги бўйича доимий мониторинглар олиб борилмоқда. Ҳозирга қадар бошқарма томонидан 467 нафар тадбиркорлик субъектлари томонидан юритилаётган текширишларни рўйхатга олиш китоби мониторинг қилинган бўлиб, натижада 90 га яқин қонунбузилиш ҳолатлари ва 1 та ҳолатда ноқонуний текшириш ўтказилганлиги аниқланди. Мазкур қонунбузилиш ҳолатлари бўйича бошқарма томонидан бугунга қадар 13 та назорат қилувчи органларга тақдимномалар киритилди.

Масалан, “Саноатконтехназорат” вилоят минтақавий инспекцияси ходимлари томонидан Шаҳрихон туманида жойлашган “Шаҳрихон электроника” МЧЖда режали текшириш ўтказилган бўлиб, текшириш жараёнида жамият томонидан юритилган текширишларни рўйхатга олиш китобини тўлдиришда Ўзбекистон Республикаси Адлия вазирлиги томонидан 2011 йил 7 ноябрда рўйхатга олинган “Текширишларни рўйхатга олиш китобини тўлдириш тартиби тўғрисида”ги Низом талабларига риоя этилмаганлиги аниқланди. Натижада бошқарма томонидан инспекцияга киритилган тақдимномага биноан масъул ходимга интизомий жазо қўлланилди.

Бундан ташқари, бошқарма ходимлари томонидан тадбиркорлик субъектлари қонуний ҳуқуқлари бузилишига олиб келадиган ноқонуний қарорларни аниқлаш ва уларни бекор қилишда ҳам ижобий ишларни амалга оширмоқда.

Масалан, вилоят Табиатни муҳофаза қилиш қўмитаси томонидан тадбиркорлик субъектларига нисбатан қўлланилган маъмурий жарималарнинг қонунийлиги ўрганилганда қўмита томонидан “Андижонмахсуссувдренаж” МЧЖ нурчиси С.Атамирзаевга нисбатан МЖтКнинг 91-моддаси бўйича таббий ва бошқа чиқиндилар ҳар-хил жойларга ташлаб юборилганлиги сабабли маъмурий ҳуқуқбузарлик тўғрисида баённома расмийлаштирилган. Бироқ ҳуқуқбузарни МЖтКнинг 77-моддаси бўйича айбдор деб топиб, унга нисбатан 125.840 сўм жарима қўлланилган. Бундан кўринадики, ҳукуқбузарни жавобгарлик масаласи нотўғри малакаланган. Мазкур ҳолат бўйича бошқарма томонидан қўмитага тақдимнома киритилиши натижасида юқоридаги ноқонуний маъмурий қарор бекор қилинди.