Янгиликлар
Тадбиркорлик тараққиёти ҳамда инвестициявий имкониятлар
Фарғона вилоят адлия бошқармаси томонидан мамлакатимизда кичик бизнес ва тадбиркорлик субъектларига шунингдек, хорижий инвесторларга яратилаётган имтиёз ва преференциялар, уларнинг ҳуқуқ ва манфаатларини ҳимоя қилиш, ҳар томонлама қўллаб-қувватлаш борасида амалга оширилаётган кенг кўламли вазифаларга бағишлаб, “Иқтисодиётда тадбиркорлик тараққиёти ҳамда инвестициявий имкониятларнинг ҳуқуқий асослари” мавзусида анжуман ташкил этилди.
Унда давлат бошқаруви, ҳуқуқни муҳофаза қилувчи органлар, тижорарт банклари ҳамда маҳаллий давлат ҳокимияти органлари шунингдек, вилоятда фаолият юритаётган тадбиркорлик субъектлари ва хорижий инвестиция иштирокидаги корхоналар вакиллари иштирок этдилар.
Таъкидланганидек, республикамизда мсутақилликнинг дастлабки йиллариданоқ тадбиркорликни тараққий эттириш ва инвестициявий имкониятларнинг ҳуқуқий асосларини мустаҳкамлашга алоҳида эътибор қаратилмоқда.
Ўтган йиллар мобайнида асосий эътибор, ишбилармонлик муҳитини тубдан яхшилаш, тадбиркорлик фаолиятини амалга ошириш учун энг қулай шарт-шароитларни яратиш мақсадида қонунчиликни такомиллаштиришга қаратилди.
Президентимиз томонидан қабул қилинган “Кичик бизнес ва хусусий тадбиркорликни янада ривожлантириш учун қулай ишбилармонлик муҳитини шакллантиришга доир қўшимча чора-тадбирлар тўғрисида”ги, “Статистик, солиқ, молиявий ҳисоботларни, лицензияланадиган фаолият турларини ва рухсат бериш тартиб-таомилларини тубдан қисқартириш чора тадбирлари тўғрисида” ги ҳамда “Ишбилармонлик муҳитини янада тубдан яхшилаш ва тадбиркорликка янада кенг эркинлик бериш чора-тадбирлари тўғрисида”ги Фармонлари бу борадаги ислоҳотларга катта рағбат бўлди.
Сўзга чиққанлар қайд этишганидек, ҳисобот тақдим этишнинг барча шакллари ва турлари кескин қисқартирилиб, текширишлар сони тубдан камайтирилди. Хўжалик юритувчи субъектларнинг фаолиятига қонунга хилоф равишда аралашганлик учун айбдор шахсларнинг жавобгарлиги кучайтирилди.
Шу ўринда қайд этиш лозимки, тадбиркорларни қўллаб-қувватлаш, уларга янада кенгроқ эркинликлар бериш борасидаги қонунчиликни такомиллаштириш жараёни бир фурсат ҳам тўхтаб қолгани йўқ.
Бунинг, исботи сифатида шуни айтиш мумкинки, жорий йил 7 апрель куни ҳам Президентимиз томонидан “Ўзбекистон Республикасида инвестиция иқлими ва ишбилармонлик муҳитини янада такомиллаштиришга доир қўшимча чора-тадбирлар тўғрисида”ги янги Фармон қабул қилинди.
Ушбу Фармонга кўра тадбиркорлик фаолияти учун шарт-шароит ҳамда ишбилармонлик муҳитини янада яхшилаш борасида 17 та норматив ҳужжатларнинг қабул қилиниши ҳамда 20 га яқин қонун ҳужжатларига тегишли ўзгартиш ва қўшимчалар киритилиши назарда тутилди.
Шунингдек,Фармонда лицензиялаш ва рухсат бериш тартиботларини, унинг учун тўланадиган тўловларни ҳамда бу ҳақдаги мурожаатларни кўриб чиқишни қисқартиришни назарда тутувчи қонун ҳужжати лойиҳасини ишлаб чиқиш белгиланган эди. Ушбу норматив ҳужжат тайёрланиб,
Президентимизнинг 2014 йил 15 апрелдаги “Тадбиркорлик фаолиятини амалга ошириш ва давлат хизматларини кўрсатиш билан боғлиқ тартиботларни янада такомиллаштириш чора-тадбирлари тўғрисида”ги қарорлари қабул қилинди. Унга кўра лицензия ва рухсатнома характерига эга ҳужжатларни олиш тартиботларидан ўтиш бўйича бир қанча енгилликлар белгиланди. 
Фарғона вилоят адлия бошқармаси томонидан ушбу йўналишда жорий йилнинг ўтган даври мобайнида тадбиркорликка шунингдек, хорижий инвестицияларга оид қонун ҳужжатлари ижро этилиши юзасидан ўтказилган ўрганишларда аниқланган қонунбузилишлар ва уларни келтириб чиқарувчи шарт-шароитларни бартараф этиш юзасидан тегишли идораларга 122 та тақдимнома, 145 та огоҳномалар киритилиб, натижада 146 нафар айбдор шахсларнинг интизомий жавобгарликка тортилиб, улардан 4 нафари эса эгаллаб турган лавозимидан озод этилди. Тадбиркорлар ва хорижий инвестициялар иштирокида корхоналарнинг манфаатини кўзлаб судларга жами 108.156 млн. сўмлик 58 та даъво аризалари киритилди.
Тадбирда тадбиркорлик субъектларини давлат рўйхатидан ўтказиш, кредит ажратиш, хўжалик низоларини кўриб чиқиш, фаолиятини тугатиш жараёнлари сезиларли даражада соддалаштирилганлиги ва арзонлаштирилганлиги ҳамда мулкни рўйхатдан ўтказиш, ер участкаларини ажратиш, қурилишга рухсатномалар бериш, электр тармоқларига уланишларда “бир дарча” тамойилларини оммавий жорий этиш бўйича ишлар тизимли амалга оширилаётганлиги таъкидланди.
Анжуман фаол савол-жавоблар руҳида олиб борилди ҳамда тадбиркорлик субъектларини қизиқтирган турли масалалар юзасидан мутахассисларнинг тегишли тушунтиришлари берилди.