Янгиликлар

Тадбиркорлик ривожи – юрт равнақи

Фарғона шаҳрида “Кичик бизнес ва хусусий тадбиркорликни ривожлантириш – тараққиёт омили” мавзусида тадбир бўлиб ўтди. Вилоят ҳокимлиги ва ташқи иқтисодий алоқалар, инвестициялар ва савдо бошқармаси ҳамкорлигида ташкил этилган мазкур тадбирда корхоналар раҳбарлари, тадбиркорлар иштирок этди.

Тадбирда Президентимиз раҳнамолигида иқтисодиётнинг етакчи тармоқларида таркибий ўзгаришларни амалга ошириш ва диверсификация қилиш, кичик ва хусусий тадбиркорликни ривожлантириш борасида амалга оширилаётган ишлар, яратилаётган имкониятлар юксак самаралар бераётгани таъкидланди.

Жорий йилнинг ўтган даврида Фарғона вилоятида 3 минг 245 янги тадбиркорлик субъекти ташкил этилиб, 73 мингга яқин янги иш ўрни яратилди. Бу шу даврда вилоятда яратилган жами иш ўрнининг 80 фоизи демакдир. Давлатимиз томонидан яратилаётган кенг имконият ва шароитлардан унумли фойдаланаётган вилоят тадбиркорлик субектларининг ҳудудий ички маҳсулот ишлаб чиқаришдаги ҳиссаси йил сайин ортиб бормоқда. Кичик бизнес ва хусусий тадбиркорлик субъектларига вилоят тижорат банклари томонидан 385 миллиард сўмлик кредит маблағлари ажратилди. Хорижий сармоядорлар иштирокида 17 корхона ташкил этилиб, янги турдаги маҳсулотлар ишлаб чиқариш ўзлаштирилди.

Вилоятда хотин-қизлар тадбиркорлиги ва касб-ҳунар коллежи битирувчиларининг бизнес лойиҳаларини молиялаштириш, ёшларни тадбиркорликка кенг жалб этиш масаласи ҳам атрофлича муҳокама қилинди.

Тадбирда Фарғона вилояти ҳокими Ш.Ғаниев сўзга чиқди.