Yangiliklar

Olmaliq “Ammofos Maxam” AJ fosforitlar asosida kompleks azot-fosforli o‘g‘itlar ishlab chiqarayotgan O‘zbekiston Respublikasining yirik korxonalaridan biri. Korxonaning 49% aksiyasi xorijiy investor - Ispaniyaning Maxam Corp S.A.U korporatsiyasiga tegishli.

Farg‘ona viloyat adliya boshqarmasiga Olmaliq “Ammofos Maxam” AJ shikoyat arizasi bilan murojaat qilib, ularga tegishli bo‘lgan “Ammofos Maxam”  firma nomidan Fargʼona viloyatida joylashgan "F.M.L" maʼsuliyati cheklangan jamiyati tomonidan ular bilan shartnoma tuzmasdan, roziligini olmasdan noqonuniy foydalanayotganligi holati yuzasidan tegishli chora koʼrishni soʼragan.
Oʼrganishda maʼlum boʼlishicha, "Ammofos Maxam" firma nomi hamda xizmat ko‘rsatish belgisi uchun tovarlar va xizmatlar xalqaro tasnifining 35-sinfiga muvofiq 1993-yilda “Ammofos Maxam” AJ  huquq egasi sifatida himoyaga olgan va himoya qilish muddati 2033 yilga qadar belgilangan.
Holat yuzasidan Fargʼona viloyatida joylashgan "F.M.L" MChJ rahbari A.L isteʼmolchilarni chalgʼitishga olib kelishi mumkin boʼlgan firma nomidan noqonuniy foydalanayotganligi o‘z tasdig‘ini topdi.  "F.M.L" MChJ rahbariga o‘zganing firma nomidan noqonuniy foydalanishni zudlik bilan to‘xtatish haqida Farg‘ona viloyat adliya boshqarmasi tomonidan taqdimnoma yuborildi. Taqdimnomaga asosan, mazkur huquqbuzarlik bartaraf etilib, korxona nomi “Pronova agro kimyo” sifatida o‘zgartirildi.
Hurmatli tadbirkorlar! O‘zgaga tegishli   firma nomi nafaqat milliy balki halqaro tizimda ham huquqiy himoya qilingan boʼlib, huquq egasiga tegishli boʼlgan mutloq huquq va uni hurmat qilishi har birimizning majburiyatimiz ekanligini unutmaylik!

Fargʼona viloyat adliya boshqarmasi

Har qanday jamiyatning iqtisodiy, ijtimoiy, maʼnaviy hayotiga xavf soladigan, qolaversa, mamlakat taraqqiyotiga toʻsiq boʻladigan illat korrupsiyadir.  
Mustaqillikning dastlabki kunlaridan boshlab mamlakatimizda huquqiy demokratik davlat va kuchli fuqarolik jamiyati barpo etishning umumiy strategiyasini amalga oshirish doirasida qonun ustuvorligini taʼminlash, fuqarolarning huquq va erkinliklarini himoya qilish, sud-huquq tizimini isloh qilish va bunda korrupsiya jinoyatiga qarshi kurashish yuzasidan qator chora-tadbirlar amalga oshirib kelinmoqda.
Demokratik qadriyatlar qaror topib borayotgan bir vaqtda davlat xizmatchilari tomonidan poraxoʻrlik, mansab mavqeini suiisteʼmol qilish bilan bogʻliq jinoyatlarni sodir etilishi hokimiyatning obroʻsizlanishiga, davlatning siyosiy, iqtisodiy, huquqiy tizimiga putur yetishiga, natijada amaldagi hokimiyatga nisbatan norozilikka sabab boʻladi. Korrupsiyaning maʼlum bir mamlakatda rivojlanishi esa oʻsha davlatning tanazzuliga olib keladi.
Korrupsiya bu – mansab mavqeidan shaxsiy maqsadlarda foydalanish bilan bogʻliq boʻlgan jinoyat turi hisoblanadi. Korrupsiya faoliyati xufyona iqtisodiyotning asosiy turlaridan biridir. Aksariyat hollarda korrupsiya deganda davlat xizmatchilari tomonidan shaxsiy manfaatlarni koʻzlab, boylik orttirish maqsadida xalqdan pora olish, qonunga xilof pul daromadlarini qoʻlga kiritish tushuniladi. Ammo, umuman olganda, davlat amaldorlarigina emas, balki, davlat tashkilotida ishlamaydigan fuqarolar ham korrupsiyaga doir munosabatlarning ishtirokchilari boʻlishi, pora pul emas, balki boshqa narsa evaziga maʼlum xizmatni amalga oshirishlari mumkin.
Darhaqiqat, korrupsiya – ildizlari davlat xizmatini tashkil etishdagi nuqsonlarga va davlat xizmatchilarining oʻziga xos psixologiyasiga borib taqaladigan ijtimoiy hodisa. Bu korrupsiyaga qarshi avvalo maʼmuriy-huquqiy va tashkiliy-boshqaruv chora-tadbirlari koʻrilishi zarurligidan darak beradi.
Korrupsiya fuqaroning davlat vakili bilan maʼmuriy munosabatlari maʼno-mohiyatini oʻzgartiradi va jamiyat uchun ham, davlat uchun ham salbiy oqibatlarni keltirib chiqaradi. “Korrupsiya – davlat organlari xodimlari moddiy yoki mulkiy yoʻsinda gʻayriqonuniy shaxsiy naf koʻrish maqsadida oʻz xizmat mavqeidan foydalanishida ifodalanadigan ijtimoiy hodisadir.
Malakatimiz rahbari “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” nomli maʼruzasida davlat hokimiyati va boshqaruvi organlari tomonidan qonun hujjatlarining ijro etilishi ustidan fuqarolik jamiyat institutlari nazoratini amalga oshirishning tizimli va samarali huquqiy mexanizmini yaratishga qaratilgan “Oʻzbekiston Respublikasida jamotchilik nazorati toʻgʻrisida”gi Qonunni qabul qilish fursati yetganligini taʼkidlab oʻtgan edi.
Umuman, jamoatchilik nazorati fuqarolik jamiyati institutlari, fuqarolarning oʻzini oʻzi boshqarish organlari tomonidan davlat hokimiyati organlariga muayyan qarorlarni qabul qilish boʻyicha murojaat etish, davlat hokimiyati organlari vakolatiga kiruvchi masalalar boʻyicha soʻrovlarni amalga oshirish, davlat hokimiyati organlari va mahallalar hududlaridagi korxona va tashkilotlar rahbarlarining hisobotlarini eshitish kabi shakllarda yoʻlga qoʻyilgani oʻz samarasini bermoqda. Qolaversa, bugungi kunda davlat Dasturlari talablarining fuqarolar yigʻini hududidagi ijrosini taʼminlashda jamoatchilik guruhlarini tuzish va oʻrganish, natijalari boʻyicha tegishli mahalliy davlat hokimiyati organlari hisobotlarini eshitish va shu orqali aniqlangan kamchiliklarni bartaraf etish choralarini koʻrish, shuningdek, mahalliy davlat organlari faoliyatiga koʻmaklashish tadbirlari samarali olib borilmoqda. Bu esa, jamoatchilik nazoratining jamiyatda ijtimoiy adolatning qaror topishi, shaxs, jamiyat va davlat aloqalarida muvozanat, tenglik, oʻzaro masʼuliyat va javobgarlikka xizmat qiluvchi asosiy omil ekanidan dalolatdir.

Bobirmirzo GAFUROV
Fargʻona viloyat adliya boshqarmasi
Huquqni qoʻllash amaliyotini
oʻrganish boʻlimi katta maslahatchisi

“Mobile ID” tizimidan ro‘yxatdan o‘tish juda oson. Buning uchun siz bir marotaba shaxsingizni tasdiqlovchi hujjat (pasport yoki haydovchilik guvoxonomasi) bilan respublikada mavjud davlat xizmatlari markazlari yoki notariuslarga tashrif buyurishingiz kifoya.

▫️Davlat xizmatlari markazi operatori yoki notariusga shaxsingizni tasdiqlovchi hujjatni taqdim etasiz va mobil raqamingizni ma'lum qilasiz;
▫️operator yoki notarius tizim orqali sizni “one.id” tizimi orqali ro‘yxatga o‘tganligingizni tekshiradi va ro‘yxatdan o‘tmagan bo‘lsangiz ro‘yxatdan o‘tkazadi;
▫️tizim orqali biometrik ma'lumotlaringiz tasdiqlanadi;
▫️ telefon raqamingizga tasdiqlovchi kod yuboriladi va kod tizimga kiritiladi.

Endi siz mobil raqamingiz orqali YIDXP (my.gov.uz) portali va boshqa ko‘pgina moliyaviy xizmatlarga telefoningiz orqali buyurtma berishingiz va tasdiqlashingiz mumkin.

Quyida ish beruvchining vafot etgan xodimning oila a'zolariga to‘lashi lozim bo‘lgan kompensatsiyani tahlil qilamiz.
O‘zbekiston Respublikasi Mehnat kodeksining 187-moddasiga ko‘ra, o‘z mehnat vazifalarini bajarishi munosabati bilan xodim vafot etgan taqdirda, uning oila a'zolariga yetkazilgan har qanday zararni (shu jumladan, ma'naviy zararni) ish beruvchi, basharti boshqacha holat nazarda tutilmagan bo‘lsa, to‘liq hajmda to‘laydi.
Ya'ni ish beruvchi marhum xodimning oila a'zolariga quyidagilarni to‘laydi:
•    ma'naviy zarar;
•    boquvchining vafot etgani munosabati bilan zarar;
•    vafoti munosabati bilan bir yo‘la beriladigan nafaqa.
Ma'naviy zarar (jismoniy yoki ruhiy azoblar) pul shaklida yoki boshqa moddiy shaklda ish beruvchi va vafot etgan xodimning oila a'zolari o‘rtasidagi kelishuvga muvofiq ravishda belgilangan miqdorda qoplanadi. Ma'naviy zararni qoplash yuzasidan nizo kelib chiqqan taqdirda, bu masala sudda ko‘rib chiqiladi.
Mehnat kodeksining 192-moddasida, boquvchining vafot etgani munosabati bilan zararni ish beruvchi tomonidan to‘lash majburiyati belgilangan.
Unga ko‘ra, xodim mehnatda mayib bo‘lishi, kasb kasalligi yoki mehnat vazifalarini bajarish bilan bog‘liq holda sog‘ligiga boshqacha tarzda shikast yetishi sababli vafot etgan hollarda, ish beruvchi marhumning qaramog‘ida bo‘lgan mehnatga qobiliyatsiz shaxslarga, shuningdek o‘n olti yoshga to‘lmagan yoki u vafot etgan kunga qadar undan ta'minot olish huquqiga ega bo‘lgan shaxslarga, marhumning vafotidan keyin tug‘ilgan farzandiga, shuningdek ota-onasidan biriga, umr yo‘ldoshiga yoki oilaning boshqa a'zosiga, agar u ishlamasdan marhumning uch yoshga yetmagan bolalari (ukalari, singillari) yoki nevaralarining parvarishi bilan band bo‘lsa, zararni to‘lashi shart.
Vafot etgan boquvchining qaramog‘ida bo‘lgan va uning vafoti munosabati bilan zararni undirishga haqli bo‘lgan mehnatga qobiliyatsiz shaxslarga to‘lanadigan zarar miqdori marhumning o‘rtacha oylik ish haqi miqdorida, uning o‘ziga va uning qaramog‘ida bo‘lgan, lekin zararni undirishga haqli bo‘lmagan mehnatga qobiliyatsiz shaxslarning ulushini chegirib tashlagan holda belgilanadi.
Mehnat kodeksining 194-moddasiga ko‘ra, xodimning vafoti munosabati bilan ish beruvchi tomonidan bir yo‘la beriladigan nafaqaning miqdori jamoa shartnomasida, agar bunday shartnoma tuzilmagan bo‘lsa, ish beruvchi bilan kasaba uyushmasi qo‘mitasi yoki xodimlarning boshqa vakillik organi o‘rtasidagi kelishuvga binoan belgilanadi. Bunda xodimning vafoti munosabati bilan bir yo‘la beriladigan nafaqaning miqdori esa, marhumning olti yillik o‘rtacha ish haqidan kam bo‘lishi mumkin emas.
Misol uchun, xodim bor yo‘g‘i bir oy ishlagan deylik, uning o‘rtacha ish haqi qanday tartibda hisoblanadi?
Ushbu tartib O‘zbekiston Respublikasi Vazirlar Mahkamasining 2005-yil
11-fevraldagi 60-sonli qarori bilan tasdiqlangan «Xodimlarga ularning mehnat vazifalarini bajarish bilan bog‘liq holda jarohatlanishi, kasb kasalliklariga chalinishi yoki salomatlikning boshqa xil shikastlanishi tufayli yetkazilgan zararni to‘lash qoidalari»da batafsil belgilab berilgan.
Marhum zarar yetkazilgan vaqtda o‘n ikki oydan kam ishlagan taqdirda, o‘rtacha oylik ish haqi haqiqatda ishlagan umumiy ish haqini ishlagan oylar soniga bo‘lish yo‘li bilan hisoblab chiqariladi. Masalan, hodimning oylik ish haqi 1,5 million so‘m va u bir oy ishlagan. Demak, uning o‘rtacha ish haqi 1,5 million deb hisoblanadi. Xodimning olti yillik o‘rtacha ish haqi shunda 1,5 million*72 oy (6 yil) =108 000 000 (bir yuz sakkiz million).
Bundan tashqari, xodim mehnat jarayonida vafot etgan taqdirda ish beruvchi qo‘shimcha ravishda dafn etish uchun zarur xarajatlarni ushbu xarajatlarni sarflagan shaxsga to‘lashi shart.
Dafn etish uchun zarur xarajatlar zararni to‘lash hisobiga kiritilmaydi.
Xo‘sh, bu borada qonunchilik nima deydi?
Mehnat kodeksining 191-moddasiga ko‘ra, aralash javobgarlik to‘lanishi lozim bo‘lgan zararning qo‘shimcha turlariga, bir yo‘la beriladigan nafaqaga, shuningdek boquvchining vafoti munosabati bilan zararni to‘lash hollariga tatbiq etilmaydi. Ya'ni xodim ish vaqtida o‘zining qo‘pol ehtiyotsizligi tufayli ko‘p qavatli uydan yiqilib vafot etgan taqdirda ham, ish beruvchi zararni to‘lashdan ozod etilmaydi.
Xulosa qiladigan bo‘lsak, qonun talabi bo‘yicha ish beruvchi vafot etgan xodimning oila a'zolariga kamida quyidagilarni to‘lashga majbur: ma'naviy zarar+boquvchining vafot etganligi munosabati bilan zarar+vafoti munosabati bilan bir yo‘la beriladigan nafaqa+dafn etish uchun zarur xarajatlar.

    Farg‘ona viloyat adliya boshqarmasi
Huquqiy targ‘ibot va ma’rifat
bo‘limi boshlig‘i
Akmal Adermatov

Vazirlar Mahkamasining 2022-yil 14-oktabrda “Davlat fuqarolik хizmatchilari tomonidan odob-aхloq qoidalariga rioya etilishini taʼminlash boʻyicha qoʻshimcha chora-tadbirlar toʻgʻrisida”gi 595-son qarori qabul qilindi.
Ushbu qaror bilan Davlat fuqarolik хizmatchilari odob-aхloqining namunaviy qoidalari hamda Odob-aхloq komissiyasi toʻgʻrisidagi namunaviy nizom tasdiqlandi.
Davlat xizmatchilari tomonidan Odob-axloq qoidalariga rioya etishida jamoatchilik vakillarining ishtiroki qanday?
Shu oʻrinda taʼkidlash joizki, davlat xizmatchilari Odob-axloq qoidalariga rioya qilishi, davlat xizmatining obroʻsiga putur yetkazishi mumkin boʻlgan xatti-harakatlardan tiyilish, axloq normalariga doimiy rioya qilishi, xushmuomalalik, eʼtiborlilik va hushyorlik bilan fuqarolarda davlatga nisbatan ishonch va hurmat hissini uygʻotishi, fuqarolarning ijtimoiy kelib chiqishi, iqtisodiy ahvoli va boshqa omillardan qatʼi nazar, ular bilan bir xil, samimiy, odob doirasida munosabatda boʻlishi belgilangan.
Ushbu normalarga rioya etilishini nafaqat tashkilot yoki davlat organi rahbari talab qilishi balki fuqarolar ham davlat xizmatchilaridan mazkur qoidalarga rioya etishlarini talab qilish huquqi ham berildi.
Bu muhim!!! Davlat xizmatchilari Odob-axloq qoidalariga rioya qilish majburiyatiga, fuqarolar esa davlat xizmatchilaridan mazkur qoidalarga mos boʻlgan kasbiy madaniyatni talab qilish huquqiga ega.
Bu nimalarda namoyon boʻladi mazmunidagi savol tugʻilishi tabiiy.
Tasavvur qiling siz davlat xizmatchisi va ish vaqtingizda fuqaro sizdan rasmiy kiyim (odob-axloq qoidalari va ichki mehnat tartibi qoidalarida belgilangan)da boʻlishingizni talab qilmoqda. Siz esa kiyinish har bir kishining shaxsiy huquqi ekanligini bildirdingiz yoki boʻlmasa jamoat joylarida (kafe, restoran va boshqa koʻngilochar maskanlarda) oʻzingizni tutish qoidalariga rioya qilmay, atrofdagilarning eʼtiborini tortuvchi ortiqcha va salbiy harakatlarga yoʻl qoʻyyapsiz va boshqa bir fuqaro sizdan bulardan tiyilishni talab qilmoqda. Siz esa hozir ish vaqti emasligi, dam olish kuni ekanligi, shuningdek ish vaqtidan tashqari vaqtlarda siz mustaqil ekanligingizni tushuntiryapsiz.
Qaror bilan xizmat faoliyatida, xizmatdan tashqarida odob-axloq qoidalari hamda xizmat faoliyatidagi tashqi koʻrinish va kiyinish uslubiga oid odob-axloq qoidalari belgilangan boʻlib, unga koʻra mehnat va ijro intizomi, ichki tartib qoidalariga, shuningdek, telefonda soʻzlashish va kiyinish madaniyatiga qatʼiy rioya etishlari lozimligi belgilangan.
Shuningdek, davlat xizmatchilarining xizmat faoliyatidagi tashqi koʻrinishi va kiyinish uslubi fuqarolarning davlat organlari va tashkilotlari faoliyatiga hurmatini, shu jumladan davlat xizmatining nufuzini oshirishga xizmat qilishi kerak.
Albatta tashqi koʻrinish ham davlat xizmatchilarida mehnat sharoitlari va xizmat turiga qarab farq qiladi. Tashqi koʻrinish xizmat majburiyatlarini bajarishi vaqtida fuqarolarning davlat tashkilotiga nisbatan hurmat bilan munosabatda boʻlishiga koʻmaklashishi, umumiy qabul qilingan ish uslubiga muvofiq boʻlishi va rasmiylikni namoyon etishi lozimligi koʻrsatilgan.
Ikkinchi holatda ham davlat xizmatchi tomonidan xizmatdan tashqarida odob-axloq qoidalari buzayotganligini koʻrishimiz mumkin. Davlat xizmatchisi nafaqat xizmat vaqtida balki, xizmatda tashqarida ham odob-axloq qoidalari amal qilishi lozim ( Davlat fuqarolik xizmatchilari odob-axloqining namunaviy qoidalari
4-bob ).
Odob-axloq qoidalariga rioya etilishini kimlar nazorat qiladi?
Davlat xizmatchilari tomonidan odob-axloq qoidalariga rioya etilishi ustidan nazorat davlat organlari va tashkilotlarining inson resurslarini boshqarish boʻlinmalari yoki Odob-axloq komissiyalari, shuningdek maxsus vakolatli davlat organi tomonidan amalga oshiriladi.
Odob-axloq qoidalariga rioya etmaganlik uchun qanday javobgarlik mavjud?
Davlat xizmatchilari tomonidan Odob-axloq qoidalariga rioya etmaganlik holati ularga nisbatan axloqiy va intizomiy taʼsir choralarini qoʻllash uchun asos boʻladi.
Odob-axloq qoidalariga rioya etmaganlik uchun Odob-axloq komissiyasi tomonidan davlat xizmatchilariga ogohlantirish, uzr soʻrash yoki rasmiy uzrnoma keltirishni talab qilish, davlat organlari va tashkilotlarining kollegial yigʻilishlarida tanbeh berish kabi taʼsir choralari qoʻllashi mumkin.
Shuningdek, Odob-axloq komissiyasi davlat xizmatchisiga nisbatan intizomiy taʼsir chorasini qoʻllash uchun davlat organlari va tashkilotlari rahbariga taqdimnoma kiritishi mumkin.
Fargʻona viloyat adliya boshqarmasi
Inson resurslari boʻlimi bosh maslahatchisi
Erkinov Ilgʻorjon Vohidjon oʻgʻli

                                      “HUQUQIY KO‘MAK DARCHALARI” FAOLIYATI TASHKIL QILINDI
    Fuqarolarning sudlar faoliyati bilan bog‘liq masalalari yuzasidan hamda sud-protsessual tartiblar haqida huquqiy tushuntirishlar berish, ushbu holatlar bilan bog‘liq masalalarda huquqiy ko‘mak ko‘rsatish, fuqarolarning ortiqcha sarsongarchiligini oldini olish maqsadida tuman (shahar) adliya bo‘limlarida “Huquqiy ko‘mak darchalari” faoliyati tashkil qilindi.
   “Huquqiy ko‘mak darchalari”  qonunchilikdagi sudlar faoliyati bilan bog‘liq hamda sud-protsessual tartiblar haqida fuqarolarga og‘zaki huquqiy tushuntirishlar hamda maslahatlar berish bilan bog‘liq faoliyatni amalga oshiradi;
“Huquqiy ko‘mak darchalari”ning asosiy maqsadi fuqarolarga huquqiy ko‘mak ko‘rsatilishini ta’minlash, shuningdek, aholida sud organlariga murojaat qilishda amaliy ko‘nikmalarni shakllantirish va rivojlantirish hamda fuqarolarning huquqiy ongi va huquqiy madaniyatini yuksaltirishga hissa qo‘shishdan iborat.

Oilada er-xotinning huquq va majburiyatlari yuzasidan tugʻilayotgan bahslar, turmushning darz ketishi, oʻzaro mojarolar, ajralishlar bugungi kunda jamiyatimizda jiddiy eʼtibor qaratilishi lozim boʻlgan masala.
Ushbu dolzarb  mavzu yuzasidan  Margʻilon shahar  hokimligida targʻibot tadbiri boʻlib oʻtdi. Unda Fargʻona viloyat  adliya boshqarmasi vakillari, FHDY organlari, mahalla fuqarolari yigʻinlari faollari ishtirok etdi.
Respublika yuristlar  malakasini oshirish markazi dotsenti Sevarxon Maripova nizoli vaziyatlar va shu qatori, ajrimlarning  oldini olishda zamonaviy mediatsiya usulidan keng  foydalanish zarurligini  taʼkidladi.
Mediatsiya – kelib  chiqqan  nizoni taraflar oʻzaro maqbul qarorga erishishi uchun ularning ixtiyoriy  roziligi asosida mediator  koʻmagida hal qilish  usuli.
Taʼkidlandiki, ajrimlarning oldini olishda  mediatsiya usulidan keng  foydalanish  yaxshi natija beradi.    
Bu usul – maxfiylik,ixtiyoriylik,taraflarning hamkorligi va teng huquqliligi, mediatorning mustaqilligi va xolisligi prinsiplari asosida amalga oshiriladi.  
Targʻibot tadbiri davomida ajrimlarning oldini olish, nizoli vaziyatlarni ijobiy hal etishga oid bir  qator usullar, amaliyotdan oʻtgan yoʻnalishlar tavsiya etildi. Hayotiy misollar yordamida ajrim yoqasida turgan oilalarni mediatsiya usulida kelishtirish, yarashtirish  usullari ochiqlandi.
Maʼlumot oʻrnida aytish mumkinki, Oʻzbekiston Respublikasining “Mediatsiya toʻgʻrisida”gi qonuni 2018-yilning 12-iyunida  Oliy Majlis qonunchilik palatasi tomonidan  qabul  qilingan va 2019-yil 1-yanvardan  kuchga kirgan.

Fargʻona viloyatining qoʻshni Qirgʻiziston hududidan oʻtib boruvchi eksklav hududi — “Shohimardon” va “Yordon” MFYda 6 yarim mingdan ziyod aholi istiqomat qiladi.

Bu hudud aholisiga eʼtibor va ragʻbat koʻrsatish, yashash sharoiti va turmush farovonligini yaxshilash hamisha davlatimiz eʼtiborida. Tibbiyot, oʻrta va maktabgacha taʼlim sohasida keyingi yillarda amalga oshirilgan oʻzgarishlar, aholi bandligini taʼminlash hamda tadbirkorlikka jalb etishga qaratilgan izchil saʼy-harakatlar shular jumlasidandir.
Fargʻona viloyati adliya boshqarmasi hamda Fargʻona tuman hokimligi hamkorligida tashkil etilgan Davlat xizmatlari markazining “Shohimardon” filiali mutaxassislari ushbu ikki mahalla ahliga xizmat koʻrsatishga kirishdi.

— Shu kunga qadar hudud aholisi davlat xizmatlaridan foydalanish uchun uzoq masofa bosib, turli ovoragarchilik bilan toʻqnashishga majbur edi, — deydi “Shohimardon” MFY raisi Ibrohimjon Hamdamov. — Yoʻlning olisligi bir azob boʻlsa, Fargʻona tumani markaziga borib-kelish uchun jami 8 ta bojxona chegara postidan oʻtishi kerak boʻlardi. Endi ushbu markazda mahalladoshlarimiz 170 turdan ortiq davlat xizmatlaridan bemalol foydalanishlari mumkin.

Maʼlumot uchun. Ayni paytda Fargʻona viloyatida DXMning 12 ta filiali faoliyat yuritmoqda va Shohimardondagi filialda dam olish kunlaridan tashqari har kuni xizmat koʻrsatiladi.

Qonunchilikka ko'ra, voyaga yetmagan shaxslar o'z huquqlari, erkinliklari va qonuniy manfaatlariga rioya etilishi masalalari yuzasidan davlat organlariga, tashkilotlarga yoki ularning mansabdor shaxslariga mustaqil ravishda murojaat berishga haqli.
(https://lex.uz/docs/3336169#4765675)
Bunda voyaga yetmagan shaxslar to'liq muomala layoqatiga ega bo'lmaganligi sababli ularning murojaatlarini ko'rib chiqmasdan qoldirishga yo'l qo'yilmaydi.
Kanalga ulanish
https://t.me/adliya_fargona

Ўзбекистон Республикаси Конституциясининг 30 йиллиги муносабати билан Адлия вазирлиги ва Ёшлар ишлари агентлиги томонидан Умуммиллий Конституция имтиҳони ўтказилади.

Имтиҳонда барча иштирок этиши мумкин.

Танловда иштирок этиш учун 8-dekabr.adliya.uz сайтида рўйхатдан ўтилади (15 ноябрдан 25 ноябрь 23:59 гача).

Танлов қуйидаги 2 босқичда 3 та тоифа учун алоҳида ташкил этилади:

1-босқич – тест синовлари:

- Умумтаълим мактаб, академик лицей ва техникум ўқувчилари учун – 26 ноябрь соат 9:00 дан 14:00 гача;
▫️ ҳуқуқшунослар ва олий таълим муассасаларида ҳуқуқшунослик мутахассислиги бўйича ўқиётган талабалар учун – 27 ноябрь соат 9:00 дан 14:00 гача;
▫️ бошқа барча фуқаролар учун – 28 ноябрь соат 9:00 дан 14:00 гача;

2-босқич – суҳбат.

Тест синовида 8-dekabr.adliya.uz сайти орқали онлайн тарзда иштирок этилади.

Тест синови 20 та тест саволи ва 1 та ижодий саволдан иборат. Тест саволларига энг қисқа муддатда тўғри жавоб берган иштирокчилар орасидан 30 нафари танлаб олиниб, уларнинг ижодий саволга жавоблари кўриб чиқилади.

Баҳолаш натижасига кўра, энг юқори балл тўплаган 10 нафар иштирокчи кейинги босқичга ўтади.

Иккинчи босқич (суҳбат) 8 декабрь – Конституция байрами арафасида ташкил этилади.

Суҳбат жараёнлари онлайн трансляция қилинади.

Ғолиблар диплом ва қуйидаги қимматбаҳо совғалар билан тақдирланади:

1-ўрин – ноутбук;
2-ўрин – телевизор;
3-ўрин – микротўлқинли печ.

Танловда фақат битта аккаунтдан иштирок этишга рухсат этилади.

Иштирокчи кейинги босқичга ўтиш вақтида турли аккаунтлардан қатнашган ҳолатлар аниқланган тақдирда, натижасидан қатъи назар, имтиҳондан четлаштирилади.