Yangiliklar

«Бюрократияга яна бир жиддий зарба» - Адлия вазири ўринбосари президентнинг бюрократик тўсиқларни бартараф этиш бўйича фармони ҳақида
Адлия вазири ўринбосари Худоёр Мелиев президентнинг «Аҳоли ва тадбиркорлик субъектларига давлат хизматларидан фойдаланишда янада қулай шароитлар яратиш, бу борада бюрократик тўсиқларни қисқартириш бўйича қўшимча чора-тадбирлар тўғрисида»ги фармони туфайли аҳолига яратиладиган енгилликлар ҳақида фикр юритди.

Бюрократик тўсиқларни бартараф этиш масаласига Адлия вазирлиги ўз фаолиятининг устувор вазифаларидан бири сифатида эътибор беради.

Вазирлик томонидан олиб борилган тадқиқот, ўрганишлар, фуқаролар мурожаатларининг таҳлили шуни кўрсатмоқдаки, ортиқча бюрократик тартиб-таомилларни қисқартириш, давлат хизматини олишда фуқароларга юқори даражада қулайликни таъминлаш зарур. Бунинг учун вазирлик хорижий тажриба ва тенденцияларни эътиборга олган ҳолда такомиллаштирувчи замонавий таклифларни мунтазам ишлаб чиқиб киритиб бормоқда.

Бюрократияга қарши курашишда энг катта ғов бюрократлар ва бюрократик тартиб-таомилларнинг ўзидир.

Ҳуқуқ ижодкорлиги ўз мазмун-моҳиятига кўра ижобий маънодаги бюрократик жараён ҳисобланади. Бирор-бир ғояни лойиҳа шаклида алоқадор вазирлик ва идораларга киритар экансиз, уни ҳимоя қилишингиз, уларни ишонтиришингиз керак бўлади.

Энди тасаввур қилинг, лойиҳангизда ўша вазирлик ва идораларда мавжуд бўлган аслида кераксиз, идоравий манфаатга хизмат қиладиган, коррупциявий хатари бор ваколатлар ва тартиб-таомилларни бекор қилишни таклиф этяпсиз. Улар буни қандай қабул қилади? Бундай паллада қарор қабул қилувчининг позицияси, иродаси ўта муҳим аҳамиятга эга.

Бюрократияга қарши курашиш, уларни қисқартириш нима учун зарур? Жавоби кундек равшан бўлса-да, аниқроқ тасаввур қилиш учун айрим маълумотларга тўхталсак.

Жаҳон банки тадқиқотига кўра, ҳозирда Ўзбекистонда йирик корхоналар раҳбарлари вақтининг 31 фоизи, кичик корхоналар раҳбарлари вақтининг 26 фоизи бюрократик масалаларни ҳал қилиш, давлат органлари ҳамда ҳокимликлар билан муносабатларга киришиш учун сарфланаётгани қайд этилган. Ваҳоланки, ушбу вақт самаралироқ тарзда, масалан, ишлаб чиқариш ҳажмини кўпайтиришга, иш самарадорлигини оширишга ва корхоналар тушумларини ошириш масалаларига сарфланиши мумкин эди.

Экспертларнинг фикрига кўра, дунё бўйича бюрократик қоидаларга риоя этишга сарфланадиган харажатлар жаҳон ЯИМнинг 17-20 фоизини ташкил этади. Хусусан, АҚШда ЯИМнинг 17 фоизини, яъни 3 трлн долларни ташкил этади.

Давлат раҳбарининг куни кеча қабул қилган «Аҳоли ва тадбиркорлик субъектларига давлат хизматларидан фойдаланишда янада қулай шароитлар яратиш, бу борада бюрократик тўсиқларни қисқартириш бўйича қўшимча чора-тадбирлар тўғрисида»ги фармони бу соҳадаги тизимли изчил сиёсатнинг ифодаси бўлди.

Фармон маъмурий тартиб-таомилларда аҳоли, тадбиркорлик субъектларининг манфаатларига кўпроқ хизмат қиладиган муҳим қоидаларни қамраб олган. Фармон ўз мазмун-моҳиятига кўра бюрократияга қарши курашнинг сифат жиҳатдан иккинчи босқичининг ҳуқуқий асосини яратди дейишимиз мумкин.

Бу йўналишда биринчи босқич Ўзбекистон Республикаси президентининг 2019 йил декабрда қабул қилинган «Бюрократик тўсиқларни янада қисқартириш ҳамда давлат органлари ва ташкилотлари фаолиятига замонавий бошқарув тамойилларини жорий қилиш чора-тадбирлари тўғрисида» қарори бўлди.

Ушбу қарорнинг ижроси таҳлил қилингач, давлат билан фуқаролар ва бизнес ўртасидаги аҳамиятини йўқотган тартиб-таомилларни янада соддалаштириш эҳтиёжи мавжудлиги аниқлашди. Шу нуқтайи назардан келиб чиқиб қайд этилган фармон лойиҳаси ишлаб чиқилди ва киритилди.

Фармон билан ушбу ҳолатларга барҳам бериш, давлат хизматлари кўрсатишни янада такомиллаштиришга қаратилган бир қатор принципал янгиликлар, қоидалар жорий этилмоқда.

Хусусан, 130дан ортиқ маъмурий тартиб-таомиллар енгиллаштирилмоқда, 460дан ошиқ қонун ҳужжатларида кўрсатилган 18 турдаги ҳужжатлар ва маълумотлар давлат органлари томонидан фуқаролардан талаб қилиниши бекор қилинмоқда. Эндиликда давлат органлари бу ҳужжатларни ваколатли давлат ташкилотидан (10та ташкилот) «Электрон ҳукумат» платформаси орқали олиши зарур.

Натижада йилига ўртача 1,5 миллиондан ортиқ фуқаро овора бўлишининг олди олинади ва уларнинг 22 млрд сўмдан ортиқ маблағи тежалади ҳамда ушбу маблағлар фуқароларнинг ўзида қолишига эришилиши прогноз қилинмоқда.

Биргина наркология диспансери ҳисобида туриши ёки турмаслиги бўйича маълумотнома олишда 276 мингдан ортиқ фуқаро овора бўлиши олди олинади ва уларнинг 4 млрд сўмдан ортиқ маблағи тежалади ёки фуқароларнинг руҳий касаллиги ҳақида маълумотнома олишда 300 мингга яқин фуқаро овора бўлиши олди олинади ва уларнинг 4,5 млрд сўм маблағи тежалиши кутилмоқда.

Фуқаролардан давлат ташкилотлари талаб қилиши мумкин бўлмаган ҳужжатлар рўйхатида шахсни тасдиқловчи ҳужжат нусхаси, шахснинг белгиланган шаклдаги фотосурати, меҳнат дафтарчалари ва уларнинг нусхалари кабилар ҳам бор. Буларнинг бекор бўлаётганининг аҳамиятини қисқа изоҳ билан тушунтириш мушкул.

70-80 йиллик, баъзилариники ундан ҳам кўп йиллик «стаж»га эга бу ҳужжатларни талаб қилиш тўхтайди – оворагарчиликлардан иборат катта бир тарихга якун ясалмоқда. Давлат ва фуқаро муносабатларида аслида бу инқилобий қадам.

Биз яқин ўтмишда давлат хизматлари соҳасини тубдан ислоҳ қилишда «фуқаролар эмас, ҳужжатлар ҳаракатланади» деган принципни эълон қилиб, амалда ижросини таъминлашга ҳаракат қилаётган эдик. Эндиликда янги «фуқаролар эмас, давлат органлари ҳаракатланади» принцип лойиҳаси устида ишлаб, фуқароларга имкон қадар виртуал давлат хизматлари кўрсатиш бўйича бош қотирмоқдамиз. Зеро, бу пандемиянинг давлат хизматларига қўйган чақириқларидан бири.

Шунингдек, 28 турдаги давлат хизматлари натижасини фуқаролар ва тадбиркорлар ўзларининг хоҳишига кўра, почта алоқаси орқали олишлари мумкин. Почта алоқаси хизматининг жорий этилиши аҳоли харажатларини камида 2 бараварга қисқартиришга, аҳолининг давлат органларига бир неча марта овора бўлиб келиб-кетишининг олдини олишга хизмат қилади.

Фармонга кўра, 2021 йил 1 майдан хорижга чиқиш биометрик паспортини Ягона интерактив давлат хизматлари портали орқали мурожаат қилиб олиш мумкин бўлади.

Фуқароларни маълум маънода оворагарчиликка олиб келаётган масалалардан бири бу – уларни жамғариб бориладиган пенсия тизимига ҳисобга қўйиш бўлган бўлса, жорий йил 1 июндан бошлаб 16 ёшга тўлган шахсларга ID-карта беришда улар бир вақтнинг ўзида солиқ органларида солиқ тўловчи сифатида ҳисобга қўйилади ва жамғариб бориладиган пенсия тизимида рўйхатдан ўтказилади. Аниқ рақамларга тўхталадиган бўлсак, 2020 йилда давлат хизматлари марказларига 338,7 минг нафар фуқаро жамғариб бориладиган пенсия тизимига ҳисобга қўйиш бўйича мурожаат қилган.

Фармон билан жисмоний шахснинг шахсий идентификация рақами барча давлат, банк, ижтимоий ва бошқа хизматларни кўрсатишда фуқаронинг шахсини тасдиқловчи ягона идентификатор ҳисобланиши, давлат органлари ва ташкилотлари томонидан жисмоний шахсларни идентификация қиладиган алоҳида рақамларни юритиш тақиқланиши белгиланди. Мазкур тартибнинг амалга оширилиши, нафақат коррупция ва бюрократияга қарши муҳим аҳамиятга эга, балки статистика аниқ бўлиши, ижтимоий сиёсатнинг манзиллилигини таъминлашда ҳам ижобий таъсир қилади.

Фуқаролик-ҳуқуқий муносабатларнинг асосий иштирокчиларидан бири бу юридик шахслар ҳисобланади. Уларнинг ташкил этилиши, рўйхатдан, қайта рўйхатдан ўтказилиши ҳуқуқий муносабатларда муҳим мазмунга эга. Бу жараён қанчалик пухта тартибга солинса, турли низоларнинг олдини олишга ҳам хизмат қилади. Мазкур жараённи тартибга солишда ягона ёндашувларни, «ўйин қоидалари»ни ишлаб чиқиш, мувофиқлаштириш зарур. Фармон билан Давлат хизматлари агентлиги юридик шахсларни давлат рўйхатидан ўтказиш бўйича ягона ваколатли орган этиб белгилангани ушбу бўшлиқни тўлдиради.

Сўзимиз сўнгида фуқаролардан бир илтимосимиз бор.

Ҳурматли фуқаролар, Адлия вазирлиги давлат бошқаруви самарадорлигини ошириш, маъмурий тартиб-таомилларни мақбуллаштириш йўналишида кенг қамровли, чуқур изланиш ва ўрганишларда давом этади. Сиздан бу борада таклиф-мулоҳазалар бўлса av11@adliya.uz манзилига тақдим этишингизни сўраймиз.

Маълумки, “Виждон эркинлиги ва диний ташкилотлар тўғрисида”ги Қонуннинг янги таҳрирдаги лойиҳаси Ўзбекистон Республикаси Президентининг 2020 йил 22 июндаги Фармони ижросини таъминлаш мақсадида Адлия вазирлиги томонидан манфаатдор вазирлик ва идоралари билан биргаликда ишлаб чиқилган.
Ўзбекистон Республикаси Олий Мажлиси Қонунчилик палатасида мазкур қонун лойиҳаси биринчи ўқишда қабул қилинган.
Қонун лойиҳасида ҳар бир шахснинг Инсон ҳуқуқлари умумжаҳон декларацияси, Фуқаролик ва сиёсий ҳуқуқлар тўғрисидаги халқаро пакт ҳамда Ўзбекистон Республикаси Конституцияси билан кафолатланган виждон эркинлиги ва диний эътиқод ҳуқуқини таъминлашга оид муносабатлар тартибга солинган.
Қонун лойиҳасининг асосий мақсади ҳамма учун виждон эркинлигини кафолатлаш, ҳар бир инсон хоҳлаган динга эътиқод қилиш ёки ҳеч қайси динга эътиқод қилмаслик ҳуқуқини таъминлаш, диний қарашларни мажбуран сингдиришга йўл қўймаслик, ҳар бир шахснинг диний эътиқоди эркинлигини тўлиқ таъминлаш, шунингдек, динлараро ва миллатлараро тотувликни сақлаш мақсадида ваколатли давлат органлари ва диний ташкилотлар ўртасидаги ўзаро муносабатларни тартибга солишдан иборат.
Қонун лойиҳасида қуйидаги асосий янгиликлар назарда тутилган:
қонуности ҳужжатлари билан тартибга солинган муносабатлар тўғридан-тўғри амал қилувчи ягона қонунга бирлаштирилди;
виждон эркинлигини таъминлаш соҳасида давлат сиёсатининг асосий йўналишлари ва принциплари ўрнатилди;
соҳада ваколатли бўлган давлат органларининг вазифа ва функциялари чегараси аниқ белгилаб берилди;
диний ташкилотларни давлат рўйхатидан ўтказиш тартиб-таомиллари енгиллаштирилди, хусусан, тақдим этиладиган ҳужжатлар сони қисқартирилди, уларни нотариал ва бошқа кўринишларда тасдиқлашга оид талаблар бекор бўлди, давлат хизматлари тўлиқ электрон кўринишда амалга оширилиши жорий этилди, рўйхатдан ўтказишни рад этиш асослари аниқ белгиланди.
Қуйидаги тартибларларнинг бекор бўлаётганлиги мамлакатимизда виждон эркинлигини таъминлашга жиддий қадам қўйилганлигидан далолат беради:
фуқароларнинг жамоат жойларида ибодат либосларида юришларига йўл қўйилмаслиги ҳақидаги чеклов олиб ташланмоқда;
диний ташкилотни тузишда маҳалла фуқаролар йиғинлари розилигини олиш тартиби бекор бўлмоқда;
диний ташкилотни тузиш ташаббускорларининг сони 100 нафардан 50 нафарга қисқартирилмоқда;
диний таълим муссасаларида диний таълим берувчи шахсларга марказий бошқарув органининг розилигини олиш талаби бекор бўлмоқда;
диний ташкилотни рўйхатдан ўтказиш учун тақдим этилган ҳужжатларни кўриб чиқишнинг 3 ойлик муддати 1 ой этиб белгиланмоқда;
диний ташкилотнинг рўйхатдан ўтказилганлиги тўғрисидаги гувоҳнома ва уставидан дубликат олиш тартиби бекор бўлмоқда.
Таъкидлаш лозимки, қонун лойиҳаси билан ўрнатилаётган қоидалар Ўзбекистон Республикасининг халқаро шартномалари талабларига тўлиқ мос келади.
Лойиҳани ишлаб чиқиш жараёнида халқаро ҳуқуқ нормалари, ривожланган хорижий давлатларнинг соҳага оид тажибалари ўрганилди, таҳлил қилинган ва улардан фойдаланилган ҳамда хорижий экспертларнинг фикрлари инобатга олинган.
Ушбу Қонуннинг янги таҳрирда қабул қилинишини жамиятимизда диний бағрикенгликни таъминлаш бўйича олиб борилаётган ислоҳотларга яққол мисол бўла олади деб ўйлайман.  

                        Фарғона вилоят адлия бошқармасининг
Нодавлат нотижорат ташкилотлари
бўлими бошлиғи Х.Умаров

Фарғона вилоят адлия бошқармаси ва туман (шаҳар) адлия бўлимлари ҳамкор ташкилотлар билан биргаликда “маҳаллабай” ишлаш тизими доирасида жорий йил 12 март куни барча туман (шаҳар)лардаги маҳаллаларда “Ҳуқуқий ахборот куни” тадбирлари ташкил қилинди.
Ушбу тадбиримизда адлия бошқармаси, судлар, ҳокимлик, давлат хизматлари маркази, бандлик органлари, хусусий нотариуслар, адвокатлар, “Мадад” ННТ ҳуқуқий маслаҳат бюроси, Фуқаролик ҳолати далолатномаларини ёзиш органлари, Бюджетдан ташқари пенсия жамғармаси  туман бўлимлари, тижорат банклари, маҳалла ва оилани қўллаб қувватлаш бўлимлари ва бошқа ташкилот масъуллари иштирок этишди.
Бевосита бугунги ўтказилган тадбирлар давомида вилоят бўйича
1961 дан ортиқ аҳоли вакиллари иштирок этган бўлса, 140 нафар фуқароларнинг мурожаатлари адлия органлари иш юритувига қабул қилинди, 1890 нафар фуқароларга (уй-жой, ижтимоий нафақалар, кредит олиш, ер участкаси олиш ва бошқалар) адлия бошқармаси, адвокатлар, нотариуслар, ФҲДЁ органлари ва бошқа ташкилотлар томонидан ҳуқуқий тушунтиришлар берилди, 121 нафар фуқароларимизга сайёр давлат хизматлари кўрсатилди, 33 та нотариал ҳаракатлар маҳаллаларнинг ўзида амалга оширилди, бандлик органлари томонидан 19 нафар фуқаролар ишга жойлаштирилди ва 101 нафар ишсиз аёллар ва ёшларга ишга жойлашиш юзасидан йўлланмалар берилди, банкларга кредит ажратиш юзасидан
17 та мурожаат қабул қилинди.
1961 га яқин фуқароларга  бугунги кунда долзарб бўлган ҳуқуқий  ахборот материаллари, яъни флаер, буклет ва ҳуқуқий қўлланмалар тарқатилди.
Бундан ташқари тадбир давомида фуқароларда қонунларга ҳурмат руҳини янада ривожлантириш мақсадида судьялар томонидан 18 та сайёр суд жараёнлари ҳам ўтказилди.

      Ўзбекистон Республикаси “Нотариат тўғрисида”ги Қонунининг
15 прим 2-моддасига мувофиқ Фарғона вилоят адлия бошқармаси ҳузуридаги малака комиссиясининг 2021 йил 24 февралда бўлиб ўтган 2-сон мажлиси баённомасига асосан:
Фарғона шаҳрида хусусий нотариал фаолият билан шуғулланувчи нотариус Бабабекова Шохида Шухратбековнанинг (лицензия FA 0017, 21.04.2020 й.) лицензияси 2021 йилнинг 25 февралдан 1 ой муддатга тўхтатилди;
Бувайда туманида хусусий нотариал фаолият билан шуғулланувчи нотариус Исмоилов Элёр Алиқўзиевичнинг (лицензия FA 0038, 21.04.2020 й.)
лицензияси 2021 йилнинг 25 февралдан 1 ой муддатга тўхтатилди

Бошқарма биносини капитал таъмирлаш ишлари учун барча лойиха смета хужжатларини тайёрлаш лот 7084976   http://dxarid.uzex.uz/ru/competitive/lot/7084976/

Медиация фуқароларнинг ҳуқуқий муносабатларидаги баҳс-мунозараларда, индивидуал меҳнат мунозаралари ва оиладаги ҳуқуқий муносабатларга нисбатан қўлланади. Ўзбекистон Республикасининг “Медиация тўғрисида”ги Қонуни 2019 йилнинг
1 январидан кучга кирди.
Медиация нима ва нима учун уни "юмшоқ ҳуқуқ" элементи деб аташади?
Тарихга назар. Қонунни ривожлантириш тарихида Вавилон, Қадимий Греция ва Қадимий Римда медиацияни қўллаш қайд этилган. Рим ҳуқуқида Юстиниан кодексидан бошлаб (милоддан аввалги VI аср) баҳс-мунозараларни ҳал қилиш учун воситачилик тан олинган. Медиация технологияси асосан савдода қўлланилган. Римликлар баҳс-мунозараларни ҳал қилувчи мутахассисларни «medium»-«воситачи» сўзи билан ифодалашган. Воситачиларга алоҳида ҳурмат билан муносабатда бўлишган. Уларни доҳийлар ва руҳонийлар билан бир қаторга қўйишган. Замонавий тушунчаларда медиация XX асрнинг иккинчи ярмида АҚШ, Австралия ва Буюк Британияда ривожлана бошлаган. Европада медиаторлар оилавий мунозараларни ҳал қилишга жалб қилинган.
Медиация нима? Умуман олганда, медиация - баҳс-мунозараларни учинчи бетараф томон иштирокида тартибга солишга доир ҳуқуқий технология. Ушбу йўналиш ўзининг маълум бир шартлари ва тамойилларига эга. Масалан:
•    томонларнинг тенг ҳуқуқлилиги;
•    ихтиёрийлик;
•    ўзаро ҳурмат;
•    конфиденциаллик;
•    жараённинг шаффофлилиги;
•    медиаторнинг холислиги.
Медиация қачон қўлланилади? Медиация суддан ташқари тартибда, баҳс-мунозарани суд тартибида кўриб чиқиш жараёнида, суднинг қарор чиқариш учун зални тарк этишидан олдин. Агар гап Ҳакамлик суди ҳақида кетаётган бўлса, шакл худди шундай бўлади. Шуни эсдан чиқармаслик лозимки, медиацияда иштирок этиш факти айбга иқрор бўлишнинг исботи ҳисобланмайди!
Медиация иштирокчилари. Жараён иштирокчилари - томонлар ва медиатор. Томонлар шунингдек ҳам жисмоний, ҳам юридик шахслар бўлиши мумкин. Томонлар ҳам медиаторлар каби икки нафар ва ундан кўп бўлиши мумкин.
Медиатор ким? Медиатор икки томонидан баҳс-мунозарани тартибга солиш учун жалб қилинувчи шахс. Жараённи ўтказишда воситачи мустақил ва холис бўлади. Воситачининг иши томонлар манфаатига қараб олиб борилади. Воситачилар икки тоифага бўлинади:
•    профессионал воситачилар - Ўзбекистон Адлия вазирлиги дастури бўйича таълим курсини ўтовчи шахслар;
•    нопрофессионал воситачилар - 25 ёшдан ошган, медиатор бўлиш истагини билдирган шахслар (улар хоҳишларига кўра Адлия вазирлиги қошида махсус таълим курсини ўташлари мумкин).
Профессионал медиаторни қандай топиш мумкин? Агар сизга профессионал воситачи керак бўлса, Ўзбекистон Республикаси Адлия вазирлигининг расмий веб-сайти ёки  Қорақалпоғистон Республикаси Адлия вазирлиги ва вилоятлар ҳамда Тошкент шаҳрининг адлия бошқармалари сайтларига киришингиз мумкин. У ерда профессионал воситачилар реестри тақдим этилган. Реестрда медиаторнинг исми ва фамилияси, контактлари, медиация соҳаси ва воситачининг жараённи олиб бориш тилига доир маълумотлар кўрсатилган.
Медиатор хизматлари учун қандай ҳисоблашилади? Таъкидлаш жоизки, нопрофессионал воситачилар фаолияти беминнат олиб борилади, профессионал воситачилар фаолияти эса - тўлов асосида ёки беминнат. Агар нопрофессионал мутахассис ишлаётган бўлса, у ҳолда унинг жараён ўтувчи жойга келиш ва кетиш, яшаш ҳамда овқатланиш харажатлари қопланиши мумкин. Ким ва қанча тўлаши томонлар келишувига боғлиқ. Одатда харажатлар томонлар орасида тенг иккига бўлинади. Агар медиатор жараённи ўтказишдан воз кечса, у дастлабки тўланган пул воситаларини қайтаришга мажбур.
Медиация жараёни қанча вақт олади? Қонунга мувофиқ жараён 30 кундан ортиқ давом этмайди. Бироқ зарурат туғилганда томонларнинг ўзаро келишуви асосида муддатни яна 1 кундан 30 кунгача узайтириш мумкин.
Медиациянинг ижобий ва салбий томонлари. Жараён - мутлақо ихтиёрий ва келишув асосида. Томонлар воситачи ёрдамида барчасининг "+" ва "-"ларини ўйлаб кўриш имконига эга бўлишади. Сиз ўзингиз истаган натижага суд оворагарчиликларисиз эришишингиз мумкин. Ушбу технология деярли салбий жиҳатларга эга эмас. Медиацияни анъанавий суд жараёнига таққослаш мумкин, унда ҳам қайси томоннинг ҳуқуқий далили кўпроқ ва ишончли бўлса, медиатор ўша томонни ғолиб деб эълон қилади.

Мирзаабдулла ПАРПИЕВ
Фарғона вилояти Учкўприк туманида
хусусий амалиёт билан шуғулланувчи нотариус

Тошлоқ туман адлия бўлимига фуқаро М.Саттиева 2005 йилда туғилган ўғли Мирзаев Хасанбой Тавакал ўғлига туғилганлик ҳақидаги гувоҳномани олишда амалий ёрдам беришни сўраб мурожаат  қилган.

Мазкур мурожаат юзасидан адлия бўлими томонидан Фуқаролик ишлари бўйича Марғилон тумалараро судига у ёки бу онадан туғилганлик фактини белгилаш тўғрисида даъво аризаси  киритилди.

  Фуқаролик ишлари бўйича Марғилон тумалараро судининг 2020 йил

23 декабрдаги ҳал қилув қарори билан адлия бўлимининг даъво аризаси қаноатлантирилди.

    Ўзбекистон Республикаси Адлия вазирлигининг ташаббуси билан амалга оширилаётган “Биз биргамиз” ижтимоий лойиҳаси доирасида Ўзбекистон Ногиронлар жамияти билан ҳамкорликда бир қатор ишлар амалга оширилиб келинмоқда.
Жумладан, лойиҳанинг навбатдаги босқичида республиканинг турли ҳудудларида ногиронлиги бўлган шахслар томонидан ишлаб чиқарилган маҳсулотларни сотиш учун мўлжалланган енгил конструкцияли кўчма дўконлар тайёрланиб, ҳудудлардаги аҳоли гавжум бўлган савдо объектларига имтиёзли тартибда жойлаштирилиши режалаштирилган эди.
Шу муносабат билан бугун Адлия вазирлиги хомийлигида қурилган енгил конструкцияли кўчма дўкон Фарғона вилоят адлия бошқармаси, вилоят ҳокимлиги ва Ўзбекистон ногиронлар жамияти Фарғона вилоят бўлими билан ҳамкорликда марказий буюм бозори ҳудудига жойлаштирилди ва махсус дўконнинг очилиш маросими ташкил этилди.

Фарғона вилоят
адлия бошқармаси

Қўштепа туман адлия бўлими Фарғона вилоят адлия бошқармаси билан ҳамкорликда жорий йилнинг 12 феврал кунида тумандаги  ҳамкор ташкилотларни жалб қилган ҳолда "Қийқи" МФЙда “Ҳуқуқий ахборот куни” лойиҳаси ташкил қилинди.

Қийқи МФЙда ўтказилган тадбирларда 100 дан ортиқ аҳоли вакиллари иштирок этди, Фуқароларга уй-жой, ижтимоий нафақалар, кредит олиш, ер участкаси олиш ва бошқа масалаларда адлия бошқармаси, туман адлия бўлими,  нотариуслар, Пенсия жамғармаси бошқа ташкилотлар томонидан ҳуқуқий тушунтиришлар берилди.  36 нафар фуқароларимизга сайёр давлат хизматлари кўрсатилди, 17 та нотариал ҳаракатлар маҳаллаларнинг ўзида амалга оширилди, бандлик органлари томонидан 6 нафар фуқаролар ишга жойлаштирилди ва 10 нафар ишсиз аёллар ва ёшларга ишга жойлашиш юзасидан йўлланмалар берилди, банкларга кредит ажратиш юзасидан 7 та мурожаат қабул қилинди. Шунингдек, тадбир сўнгида адлия бўлими ҳодимлари томонидан фуқароларга ҳуқуқий ахборот материаллари, флаер, буклет ва ҳуқуқий қўлланмалар тарқатилди.  

Ўзбекистон Республикаси “Нотариат тўғрисида”ги Қонунининг
15 прим 2-моддасига мувофиқ Фарғона вилоят адлия бошқармаси ҳузуридаги малака комиссиясининг 2021 йил 2 февралда бўлиб ўтган 1-сон мажлиси баённомасига асосан:
Фарғона шаҳрида хусусий нотариал фаолият билан шуғулланувчи нотариус Исмаилова Матлюба Сотволдиевнанинг (лицензия FA 0006, 21.04.2020 й.) лицензияси 2021 йилнинг 3 февралдан ўн беш кун муддатга тўхтатилди;
Қўқон шаҳрида хусусий нотариал фаолият билан шуғулланувчи нотариус Мелибоева Мусаффо Махаммадалиевнанинг (лицензия FA 0027, 21.04.2020 й.)
2021 йилнинг 3 февралдан ўн беш кун муддатга тўхтатилди;
Фарғона шаҳрида хусусий нотариал фаолият билан шуғулланувчи нотариус Эрматова Зуҳра Масировнанинг (лицензия FA 0061, 21.04.2020 й.) лицензияси 2021 йилнинг 3 февралдан бир ой муддатга тўхтатилди;
Риштон туманида хусусий нотариал фаолият билан шуғулланувчи нотариус Жўраев Шерзод Мухиддиновичнинг (лицензия FA 0010, 21.04.2020 й.) лицензияси 2021 йилнинг 3 февралдан бир ой муддатга тўхтатилди;
Олтиариқ туманида хусусий нотариал фаолият билан шуғулланувчи нотариус Пўлатов Шуҳрат Рахматжоновичнинг (лицензия FA 0053,
21.04.2020 й.) 2021 йилнинг 3 февралдан бир ой муддатга тўхтатилди;
Данғара туманида хусусий нотариал фаолият билан шуғулланувчи нотариус Каримова Иноят Максудалиевнанинг (лицензия FA 0039, 21.04.2020 й.)
2021 йилнинг 3 февралдан бир ой муддатга тўхтатилди.