Yangiliklar

Фарғона вилоятида фаолият кўрсатаётган давлат нотариал идоралари нотариуслари ҳақида маълумот

  Ҳурматли фуқаролар, коронавирус инфекцияси тарқалишига қарши кучайтирилган тартиб жорий этилганлиги муносабати билан нотариусларга мурожаат қилиш фақат кечиктириб бўлмайдиган зарурият юзага келганда (биринчи навбатда васиятнома, ишончнома, гаров, ипотека бўйича)
e-notarius.uz сайти орқали тегишли нотариусга ҳужжатларни олдиндан электрон шаклда тақдим этиш ва электрон навбатга ёзилиш орқали амалга оширилади.

    1 савол: Меннинг 2 нафар фарзандим бор, отаси хизмат сафарида, уларни бири 2-синфда ва иккинчиси ДМТМ тарбияланувчиси бўлиб, уларни хар иккиси ҳам 16 мартдан буён уйдалиги сабаб мехнат таътили олиб уларга уйда қолиб қарашга мажбурман, бироқ менга ишхонамда жавоб бермаяпти шу тўғрими?

Жавоб: нотўғри, чунки бундай холларда иш берувчи ходимнинг розилиги билан масофавий иш усули, мослашувчан иш графиги ёки уйда ишлашга вақтинча ўтказиш ёхуд иш хақи сақланмаган холда таътил берилиши лозим. Низомга асосан Меҳнат таътили карантин даврида мактабгача таълим ташкилотлари ва умумтаълим муассасаларининг фаолияти тўхтатилган даврда мактабгача таълим ташкилотлари тарбияланувчиси бўлган боланинг ва умумтаълим муассасаларининг бошланғич синф ўқувчиси, яъни 1-синфдан 4-синфгача бўлган ўқувчининг ота-она (улар ўрнини босувчи шахс, васий, ҳомий)сига берилади.

      2 савол: Мени ёшим 50 да,  2-тип қандли диабет касаллигига чалинган ва 10 йилдан буён “Инсулин” препаратини олиб келаман. Касаллигимни инобатга олиб уйдан туриб ишлашга хақим борми?

Жавоб: ха, чунки бундай холларда иш берувчи ходимнинг розилиги билан уйда ишлашга вақтинча ўтказиши лозим. Низомга асосан уйда ишлашга ўтиш ҳуқуқидан биринчи навбатда ҳомиладор аёллар, кексалар, имконияти чекланган шахслар ва сурункали касалликларга чалинган ходимлар фойдаланади.

        3 савол: Мен кўп бора масофадан туриб ишлаш, масофадан туриб ишлаяпмиз деган сўзларни эшитяпман, масофадан туриб ишлаш нима дегани?

Жавоб: Масофадан иш деганда, ходимнинг меҳнат шартномасида кўрсатилган меҳнат мажбуриятларини иш берувчининг жойлашган ҳудудидан ташқарида, бевосита ёки билвосита назоратида бўлган доимий иш жойи, ҳудуд ёки объектдан ташқарида бажариладиган иш усули тушунилади.

      4 савол: Менга раҳбарим томонидан масофадан туриб ишлайсиз деб айтмоқда, бундай ишласам иш хақим камайиб кетмайдими, масофадан туриб ишлаганимда иш хақим қандай тўланади?

Жавоб: Масофавий ишга вақтинчалик ўтказилган ходимнинг меҳнатига ҳақ тўлаш қуйидагича амалга оширилади, яъни меҳнатга ҳақ тўлашдаги соатбай асосида — ходимнинг масофавий ишга ўтказилгунга қадар белгиланган тариф ставкаси (лавозим оклади)дан келиб чиққан ҳолда амалга оширилади, иш хақингиз миқдорига таъсир этмайди.

     5 савол: Ходимларни уйда туриб ишлаши нима дегани?

Жавоб: Уйда ишлаш -  ходим яшаш жойи бўйича ёки унга ёхуд унинг оила аъзоларига тегишли бўлган бошқа биноларда иш берувчининг буюртмалари бўйича товарлар ишлаб чиқариш ёки хизматлар кўрсатиш бўйича амалга оширилаётган ишни англатади ва уйда ишлашни ташкил этишга, иш берувчи ва ходим ўртасида тузилган меҳнат шартномасига киритилган ўзгартиришларга мувофиқ уйда ишлашни амалга ошириш учун зарур бўлган шароитлар, шу жумладан турар-жойи бўлган тақдирда йўл қўйилади.

      6 савол: Мен оилавий шароитимдан келиб чиқиб уйда ишлашга ўтмоқчиман, агар уйда ишлашга ўтсам иш хақим қандай тўланади?

Жавоб: Уйда ишлашга ўтказилган ходимнинг меҳнатига ҳақ тўлаш қуйидагича амалга оширилади, яъни меҳнатга ҳақ тўлашдаги соатбай асосида — ходимнинг уйда ишлашга ўтказилгунга қадар белгиланган тариф ставкаси (лавозим оклади)дан келиб чиққан ҳолда ёҳуд меҳнатга ҳақ тўлашдаги ишбай асосида.

Саволларга Бувайда тумани адлия бўлими бошлиғи

Умиджон Назиров жавоб берди.

Карантин шароитида касаллик тарқалишини олдини олишнинг энг муҳим шарти – тегишли қоида ва тавсияларга сўзсиз риоя этишдир. Ўз вақтида карантин қоидаларига етарли даражада риоя этмаслик, масалага енгил қараш оқибатларини бугун бутун дунёни кузатиб турибмиз.
Карантин қоидаларига риоя этмаслик оқибатида, бугун дунёда минглаб одамлар вафот этмоқда.
Бизда ҳам айрим фуқаролар вирус хавфини тўлиқ англамай ва унга қарши кўрилаётган чора-тадбирларнинг аҳамиятини тушунмаган ҳолда карантин тартибини бузишга ҳаракат қилиб, касалликнинг мамлакатимизда кенг тарқалиши хавфини туғдирмоқда.
Санитарияга оид қонун ҳужжатларини ёки эпидемияга қарши кураш қоидаларини бузганлик учун қонунчилигимизда жуда кескин жавобгарликлар мавжуд ва эндиликда улар янада кучайтирилди.
Карантин шароитида давлат санитария назорати органларининг қонуний талабларини, масалан, тиббий текширувдан ўтиш ва даволаниш, карантинни ўташ учун белгиланган жойларга етиб бориш ҳамда ушбу жойни белгиланган муддат давомида тарк этмаслик, касаллик юқиш хавфи мавжуд бўлган даврда мулоқотда бўлинган шахслар ва борилган жойлар ҳақидаги маълумотларни ошкор қилиш тўғрисидаги ёки бошқа қонуний талабларини узрли сабабларсиз бажармаслик жиноят сифатида баҳоланади.  
Илгари карантин қоидаларини бузганлик учун, агар бу одамларнинг оммавий касалланишига олиб келса, 3 йилгача озодликдан маҳрум қилишгача жазо белгиланган. Кучайтирилган тартибга кўра, эндиликда бунинг учун
5 йилгача озодликдан маҳрум қилиш жазоси қўлланилади.
Агар ўша ҳаракат одамларнинг ўлимига сабаб бўлса, 5 йилдан 8 йилгача озодликдан маҳрум қилиш билан жазоланиши мумкин эди. Эндиликда карантин қоидаларини бузган шахс 10 йилгача озодликдан маҳрум қилиниши мумкин.
Республикамиз қонунчилигига кўра ёлғон маълумот тарқатган ҳам жазоланади, Жиноят кодекси 244-5-модда билан тўлдирилди. Инсон учун хавфли бўлган юқумли касалликлар ҳақида ҳақиқатга тўғри келмайдиган маълумотларни тарқатиш қуйидагича жазоларни юзага келтириш мумкин:
•    44 млн 600 минг сўмгача жарима;
•    300 соатгача мажбурий жамоат ишлари;
•    2 йилгача ахлоқ тузатиш ишлари.
Бундай маълумотларни нашр қилиб, кўпайтириб, ОАВ, Интернет орқали тарқатганлар икки баравар кўпроқ тўлайди – 89 млн 200 минг сўмгача жарима! Бу ҳолат учун ҳатто 3 йилгача озодликдан маҳрум қилиш билан боғлиқ жиноий жавобгарлик белгиланди.
Мақсад, биринчи навбатда, асоссиз ваҳима тарқалишининг олдини олишдир. Ваҳиманинг олди олинсагина жамоат хавфсизлиги таъминланади, мутасадди идораларнинг нормал фаолият юритиши учун шароит яратилади.
Маъмурий жавобгарлик тўғрисидаги кодекс тиббий мажбурлов чораси қўлланилишини назарда тутувчи модда билан тўлдирилди.
Тиббий мажбурлов чораси шахсни маъмурий жавобгарликдан озод этадими? Йўқ. Яъни карантин шароитида қоидаларни бузган шахсга нисбатан маъмурий жавобгарлик белгиланса, у жарима тўлабгина қолмай, бир пайтнинг ўзида 30 суткагача муддатда тиббий мажбурловни ҳам ўтайди.
Амалдаги кодексда мажбурий тиббий чоралар қўллаш учун ҳуқуқий асослар мавжуд эмас эди. Ушбу чоралар санитария ва эпидемияларга қарши курашиш қоидаларини бузган ва айни пайтда касалликнинг янада кенгроқ тарқалишига сабабчи бўлиши мумкин бўлган шахсни жамиятдан ажратган ҳолда мажбурий равишда даволаш имкониятини беради. Ушбу чоралар айнан карантинли ва инсон учун хавфли юқумли касалликлар пайдо бўлиши ва тарқалиши шароитида қўлланади.
Маъмурий жавобгарлик тўғрисидаги кодекснинг 54-моддаси ниқобсиз юрганлик учун жавобгарликни назарда тутувчи қисм билан тўлдирилди.  
Карантин шароитида жамоат жойларида ниқобсиз бўлиш 1 млн 115 минг сўм миқдорда жарима солишга сабаб бўлади.
Ушбу чорага касаллик “занжирини узувчи” восита сифатида қараш ўринли. Катта жарима тўламаслик учун ҳам ниқоб тақилади, касалликнинг тарқалиш географияси тўсилади, ўз-ўзидан атрофдагилар хотиржамлигига эришилади.
Бугунги кунда бутун инсоният катта синовни бошдан кечирмоқда. Қонуний тартиблар қатъий ўрнатилгани билан, ҳамма гап одамларнинг онгли равишда тўғри қарор қабул қилишида қолади. Барча-барчаси жамоавий хавфсизлик учун ўз шахсий масъулиятини ҳис этиш ва виждонан ҳаракат қилишга боғлиқ. Кичкина масъулиятсизлик туфайли халқ ҳаёти ва саломатлигини хавф остига қўймайлик.


Ш.Холматов
Учкўприк туман адлия
бўлими бошлиғи

    16 мартдан барча давлат ва нодавлат таълим муассасаларида (боғча, мактаб ва университетлар) карантин эълон қилинди. Ўз навбатида бизга Меҳнат қонунчилиги бўйича жуда кўплаб саволлар келиб тушмоқда. Қуйида шу саволларга жавоб берамиз.

Ходим карантинга олинса унга қайдай кафолатлар мавжуд?

             Ўзбекистон Республикаси Меҳнат кодексининг 285-моддасига кўра,карантин эълон қилинганда вақтинча меҳнатга қобилиятсизлик нафақаси тўланади.
             Давлат ижтимоий суғуртаси бўйича нафақалар тайинлаш ва тўлаш тартиби тўғрисидаги низомнинг (рўйхат рақами 1136, 14.05.2002 й.) 17-бандига кўра, агарда ходим карантин вақтида санитария-эпидемиология хизмати органлари томонидан атрофидаги шахслар орқали юқумли касалликка чалиниш хавфини олдини олиш мақсадида ишдан четлатилган бўлса нафақа берилади.
    Яъни агар ходим карантинга олиниши муносабати билан ишдан четлаштирилган бўлса, ходимнинг бу даври учун унинг иш жойидан меҳнатга қобилиятсизлик нафақаси тўлаб берилиши керак.
           Вақтинча меҳнатга қобилиятсизлик нафақаси меҳнатда майиб бўлган ва касб касаллигига чалинганда иш ҳақининг тўлиқ миқдорида, бошқа ҳолларда эса, ходимнинг давлат ижтимоий суғуртаси бадалларини тўлаган муддатига (умумий иш стажига), қарамоғидаги вояга етмаган болаларининг сони ва бошқа ҳолатларга қараб, иш ҳақининг олтмиш фоизидан юз фоизигача миқдорда тўланади.
           Вақтинча меҳнатга қобилиятсизлик нафақасининг энг кам миқдори қонун ҳужжатларида белгиланган меҳнатга ҳақ тўлаш энг кам миқдорининг 35,2 фоизи (239 минг сўм) дан оз бўлмаслиги ва нафақа ҳисоблаб чиқариладиган иш ҳақи миқдоридан ортиб кетмаслиги лозим.

          Карантин туфайли айрим ташкилотлар фаолиятида тўхталишлар бўлса ходимларга (масалан, боғча тарбиячилари, педагоглар) қандай кафолатлар бор ?

          Меҳнат кодексининг 159-моддасига кўра, ходимнинг айбисиз бекор туриб қолинган вақтда унинг ўртача иш ҳақи сақланади. Яъни, карантин ҳолатида корхона томонидан ходимларга бекор қолиш даври учун ўртача ойлик иш ҳақи тўланаверади.

         Иш берувчи ходимга бундай ҳолатда иш ҳақи сақланмаган ҳолда таътил бериши мумкинми?

          Меҳнат кодексининг 150-моддасига кўра, иш ҳақи сақланмаган ҳолда таътил ходимнинг аризасига кўра иш берувчи билан келишувга кўра белгиланади. Яъни иш берувчи ходимнинг розилигисиз унга иш ҳақи сақланмаган ҳолда таътил бера олмайди.
          Карантин тадбирларига сафарбар этилган ходимларга қандай кафолатлар мавжуд?

         Меҳнат кодексининг 167-моддасига кўра, ходим жамият манфаатларига доир ҳаракатлар қилганда (авариялар, табиий офатларнинг оқибатларини тугатиш, инсон ҳаётини сақлаб қолиш ва бошқа ҳолларда) ана шу даврда унинг иш жойи (лавозими) ва ўртача иш ҳақи сақланади.
          Ўзбекистон Республикаси Вазирлар Маҳкамасининг 1997 йил 11 мартдаги 133-сон қарори 5-иловаси - ходимларнинг давлат ёки жамоат вазифаларини бажариши, шунингдек, уларнинг жамият манфаатларига доир ҳаракатлар қилиши билан боғлиқ кафолатли тўловларни тўлаш тартибига кўра, ходимларнинг давлат ёки жамоат вазифаларини бажариш, шунингдек, жамият манфаатларига доир ҳаракатлар қилишлари вақтида уларнинг иш жойи (лавозими) ва ўртача иш ҳақи сақланади.
          Шунингдек, давлат ёки жамоат вазифаларини бажариш вақтида (қонун билан белгиланган ёки тегишли органнинг чақириқ қоғозида, хабарномасида кўрсатилган вақтда) иш берувчи ходимнинг иш жойи (лавозими)ни сақлаган ҳолда уни ишдан озод қилиши шарт.

         Ёш болани парвариш қилаётган ишловчи оналарга қандай кафолатлар бор, чунки боғчалар ишламайдику?

Меҳнатга лаёқатсизлик варақаларини бериш тартиби тўғрисида»ги йўриқноманинг (рўйхат рақами 2667, 17.04.2015 й.) 37-бандига кўра, мактабгача таълим муассасасида ёки олти ёшга тўлмаган болага ўрнатилган карантин даврида болага қараш учун ота-онасидан бирига ёки оиланинг бошқа аъзосига санитария-эпидемиология назорати маркази томонидан карантин белгиланган, лекин ўн тўрт календарь кунидан ошмаган муддатга меҳнатга лаёқатсизлик варақаси берилади.
           Меҳнат кодексининг 150-моддасига кўра иш берувчи икки ёшдан уч ёшгача бўлган болани парвариш қилаётган аёлларга, ўн икки ёшга тўлмаган икки ва ундан ортиқ болани тарбиялаётган аёлларга уларнинг хоҳишига кўра, иш ҳақи сақланмаган ҳолда муқаррар тартибда таътил бериши шарт.
          Ўз навбатида ҳурматли фуқароларимиздан ваҳимага берилмасдан санитария ва гигиена қоидаларига қатьий риоя этишни ва белгиланган қонунларга сўзсиз итоат этишни сўраб қоламиз.
         Меҳнат кодексининг 176-моддасида ходимнинг бурчлари келтириб ўтилган. Унга кўра ходим ўз меҳнат вазифаларини ҳалол, виждонан бажариши, меҳнат интизомига риоя қилиши, иш берувчининг қонуний фармойишларини ўз вақтида ва аниқ бажариши, технология интизомига, меҳнат муҳофазаси, техника хавфсизлиги ва ишлаб чиқариш санитарияси талабларига риоя қилиши шарт.
          Бундан ташқари қонунчиликда карантин, санитарияга оид қонун ҳужжатларини бузганлик учун жавобгарлик белгиланган.
          Ўзбекистон Республикаси Маъмурий жавобгарлик тўғрисидаги кодексининг 54-моддасига кўра, карантинли ва инсон учун хавфли бўлган бошқа юқумли касалликлар пайдо бўлиши ёки тарқалишининг олдини олиш мақсадида белгиланган мажбурий қоидаларни бузиш фуқароларга базавий ҳисоблаш миқдорининг уч бараваридан беш бараваригача, мансабдор шахсларга эса — ўн бараваридан ўн беш бараваригача миқдорда жарима солишга сабаб бўлади.
          Ўзбекистон Республикаси Жиноят кодексининг 257-1-моддасига кўра, санитарияга оид қонун ҳужжатларини ёки эпидемияга қарши кураш қоидаларини бузганлар беш йилдан саккиз йилгача озодликдан маҳрум қилиш билан жазоланади.

Бағдод туман адлия бўлими
бошлиғи И.Исаков

  Доимий равишда бошқарма жамоаси орасидан энг яхши ходим аниқланиб, рағбатлантириб борилмоқда ҳамда бу ўзига хос анъанага айланган. Мазкур анъанани давом этирган ҳолда, Қува тумани адлия бўлими катта маслаҳатчиси  Назиров Ботиржон Икромжонович 2020 йил март ойининг “энг яхши ходими” деб топилди.
У қонун хужжатларини, шунингдек соҳа фаолиятини такомиллаштириш бўйича ишлаб чиққан таклифлари, меҳнат ва ижро интизомига риоя этиши, жамоат ишларида ҳамда ҳуқуқий тарғибот тадбирларидаги фаол иштироки билан ўз ҳиссасини қўшиб келмоқда.
Фарғона вилояти адлия бошқармаси жамоаси Назиров Ботиржон Икромжоновични ушбу эътироф билан табриклайди. Унинг келгусидаги ишларида муваффақиятлар тилайди.

Айни кунларда мамлакатимизда коронавирус касаллигини юқтириб олиш эҳтимолини имкон қадар чегаралаш, вирусли инфекция тарқалишининг олдини олиш мақсадида кенг қамровли ҳаракатлар амалга оширилмоқда.
Бу борада юртимиздаги ҳар бир инсон, ҳар бир оилада жараёндаги бурч ва масъулият туйғусини кучайтириши муҳим аҳамиятга касб этади. Боиси шахсий гигиена қоидаларига қатъий амал қилиш, бугунги эпидемиологик жиҳатдан мураккаб бир шароитда давлатимиз томонидан жорий этилган тартиб-қоидаларнинг тўлиқ бажарилиши хавф-хатар манбаини сезиларли даражада камайтиради.
Афсуски, айрим замондошларимизнинг бепарволиги, лоқайдлиги оқибатида баъзан мавжуд вазият ва у билан боғлиқ хавф-хатарга нисбатан жиддий муносабатда бўлмаслик ҳолатлари ҳам учраб турибди. Бу эса пандемияга қарши доимий кураш олиб борилаётган бугунги синовли кунларда кечириб бўлмас ҳолатдир.
Ижтимоий тармоқлар ва оммавий ахборот воситалари орқали барчамиз коронавирус пандемияси билан боғлиқ жараёнларни мунтазам кузатаяпмиз. Президентимиз ва ҳукуматимиз томонидан бу офатдан халқимизни асраш бўйича таъсирчан чора-тадбирлар белгиланмоқда.
Шу йилнинг 26 март куни давлатимиз раҳбари томонидан коронавирус инфекцияси тарқалишига қарши курашишни кучайтириш масалаларига бағишлаб ўтказилган навбатдаги видеселектор йиғилишида айни вазиятдан келиб чиққан ҳолда бир қатор устувор вазифалар белгиланди.
Фидойи шифокорларимизнинг бугунги фаолияти жанг майдонидаги қаҳрамонликка тенглаштирилди. Бу соҳа ходимлари меҳнатини муносиб рағбатлантириш мақсадида 5 миллион сўмдан 100 миллион сўмгача бўлган мукофот пуллари бериш тартиби жорий этилди. Ҳақиқатан ҳам бугунги кунда коронавирус инфекциясига қарши курашиш фаолиятига жалб этилган ҳар бир мутахассиснинг фидойилиги тенгсиз қаҳрамонликдир.
Дунё бўйлаб, хусусан, мамлакатимизда шифокорларнинг ўз касбига садоқати, халқимиз, ота-оналаримиз, фарзандларимиз соғлиғи йўлида туну кун қилаётган меҳнати барчамиз учун жасорат намунаси бўлмоқда.
Вилоят адлия бошқармаси ҳам муҳим жараёнда бир сафда
Бу борада вилоятимизда ҳам 4 та сектор, ҳуқуқни муҳофаза қилувчи идоралар раҳбарлари ҳудудларга бириктирилди. Аҳоли билан юзма-юз мулоқотлар ўтказиш орқали ваҳима ва саросимага ҳожат йўқ эканлиги тушунтириляпти. Шаҳар-туманлардаги мавжуд ҳолат секторлар кесимида тиббиёт, санитария-эпидемиологик осойишталиги маркази мутахассислари, маҳаллий ҳокимликлар иштирокида ўрганиляпти.
Мамлакатимизда коронавирус инфекцияси тарқалиб кетишининг олдини олдиш мақсадида жорий йилнинг 25 март санасидан бошлаб республикамизнинг барча ҳудудларида ҳимоя ниқобларисиз ҳаракатланиш қатъиян ман этилди. Хабарингиз бор, шундай ҳолатлар аниқланганда маъмурий тартибда жаримага тортиш ҳақида огоҳлантирилди.
Афсуски, ниқобли тартибга амал қилмай, ўз билганича ҳаракатланаётган фуқаролар ҳам учраб турибди. Энг ачинарлиси, озиқ-овқат савдоси билан шуғулланаётган сотувчиларнинг ниқобли тартибга амал қилмаётганликларини кўриб таажжубланасан киши. Ахир улар бевосита харидорлар билан муомала қиладилар. Айрим фуқароларимизнинг мана шундай тартибдан хабари бўла туриб, ўз ҳолича иш кўраётгани, тиббиёт ниқобини тақмасдан ҳаракатланаётгани атрофдагиларнинг ҳам ҳақли эътирозига сабаб бўлди.
Бугунги қалтис вазиятда турли баҳоналар билан ўзларини оқлашга уринган юқоридаги каби ҳамюртларимиз хатти-ҳаракатлари билан атрофдагиларнинг ҳам саломатлигига хавф солаётганликларини ўйлаб кўрсалар ёмон бўлмасди.
Жарима тўлаб юрманг…
Республика махсус комиссияси ахборотида қайд этилганидек, мамлакатимиз фуқароларининг соғлиғини ҳимоя қилиш мақсадида зарур бўлмаган ҳолларда (хизмат фаолиятини амалга ошираётган давлат органлари ва муассасалари ҳамда жамоат ташкилоти ходимларидан ташқари), уйидан ташқарига чиқиши чекланади. Ўта зарур ҳоллардагина кўчага чиққанда (дорихона, озиқ-овқат дўконлари) шахсий ҳимоя воситаси (ниқоб)да бўлиши шарт. Бордию фуқаролар уйидан ташқарига шахсий ҳимоя воситаси (ниқоб)сиз чиқса, қонунда белгиланган тартибда жаримага тортилади. Яъни, базавий ҳисоблаш миқдорининг беш баробари миқдорида 1 115000 минг сўм жарима қўлланилади. Агарда бу қилмиш одамларнинг оммавий касалланишига, одамларнинг ўлимига олиб келса, шахс жиноий жавобгарликка тортилади.
Лоқайдлик ва эътиборсизликнинг бадали жуда оғир бўлиши, нафақат ҳамёнга, балки инсон соғлиги ва ҳаётига хавф солиши мумкинлигини ҳеч биримиз унутишга ҳаққимиз йўқ. Буни ҳис этиш, бугунги синовли вазият тақозосини тўғри тушуниш ҳар биримизнинг фуқаролик бурчимиздир. Зеро, саломатлигимиз, ўзимиз ва яқинларимизнинг ҳаёти ана шу позициямизга боғлиқ.
Абдурахмон ТАДЖИБАЕВ,
Фарғона вилоят адлия бошқармаси
бошлиғининг биринчи ўринбосари

Фарғона вилоятидаги давлат органлари ва ташкилотлари юридик хизматларида мавжуд бўш иш ўринлари ҳақида маълумот

1. Сўҳ тумани ҳокимлиги
Манзил: Сўҳ тумани А.Темур кўчаси, 0 (373)-462-55-90

2. Фарғона тумани молия бўлими
Манзил: Фарғона туман Водил қишлоғи, Марғилон кўчаси, 0 (373)-224-47-46

3. Бюджетдан ташқари пенсия жамғармаси Сўх туман бўлими
Манзил: Сўҳ тумани, А.Темур кўчаси 6-уй, 0 (373)-226-43-36

4. Бюджетдан ташқари пенсия жамғармаси Бешариқ туман бўлими
Манзил: Бешариқ тумани Бешариқ шаҳри О.Водий кўчаси 96-уй, 0 (373)-226-43-36

5. Ёзёвон туман халқ таълими бўлими
Манзил: Ёзёвон туман Мустақиллик кўчаси 31-уй, 0 (373)-244-31-18  

6. Учкўприк тумани Марказий маданият ва аҳоли дам олиш маркази
Манзил: Учкўприк тумани Наврўз шох кўчаси, 0 (373)-515-24-64

7. Қўштепа тумани молия бўлими
Манзил: Қўштепа туман  Бахмал кўчаси 3-уй, 0 (373)-224-47-46

8.Фарғона вилоят “Сувоқава” ДУК Фарғона шаҳар бўлими
Манзил: Фарғона шаҳар Рашидов кўчаси 5-уй, 0 (373)-241-72-54

9. Фарғона вилояти Фавқулодда вазиятлар бошқармаси
Манзил: Фарғона шаҳар Мустақиллик кўчаси 198-уй, 0 (373)-226-84-22    
                      
10. Қўқон шаҳар Марказий маданият ва аҳоли дам олиш маркази
Манзил: Қўқон шаҳар Ўрда таги 10а-уй, 0 (373)-542-21-92

11.Норин-Фарғона ирригация тизими
Манзил: Боғдод тумани Уч-уй қишлоғи.

12. Учкўприк туман ҳокимлиги
Манзил:Учкўприк тумани Навруз кўчаси 46-уй, 0 (373)-515-13-52

13. Фарғона вилояти давлат санитария эпидемиология назорати давлат инспекцияси
Манзил: Фарғона шаҳар Табобат кўчаси 26 уй, 0 (373)-226-12-75

14. Фарғона вилояти Оила ва маҳалла бошқармаси


“Юридик хизмат ходимини лавозимга тайинлаш ва озод қилиш масалаларини адлия органлари билан келишиш тартиби тўғрисида”ги Низом (2017 йил 28 февраль, рўйхат рақами 2864)га мувофиқ давлат органлари
ва ташкилотлари номзодни лавозимга тайинлаш масаласини келишиш учун тегишли адлия органига қуйидаги ҳужжатларни тақдим этади:
давлат органи ва ташкилоти раҳбарининг номзодни лавозимга тавсия этиш тўғрисидаги тақдимномаси;
номзоднинг ушбу Низомнинг 1 ва 2-иловаларига мувофиқ шаклдаги анкетаси ва яқин қариндошлари ҳақидаги маълумот;
иш берувчи давлат органи ва ташкилотининг муҳри билан аслига тўғрилиги тасдиқланган номзоднинг олий юридик маълумоти тўғрисидаги дипломининг нусхаси ёки олий юридик маълумоти тўғрисидаги дипломдан кўчирма — Ўзбекистон Республикаси олий таълим муассасаларини давлат гранти бўйича ўқиб тугатганлар учун;
иш берувчи давлат органи ва ташкилотининг муҳри билан аслига тўғрилиги тасдиқланган номзоднинг олий маълумоти тўғрисидаги дипломининг нусхаси ва Тошкент давлат юридик университети ҳузуридаги Юридик кадрларни халқаро стандартлар бўйича профессионал ўқитиш марказида юридик мутахассислик бўйича қайта тайёрлаш курсларини тамомлаганлик тўғрисидаги дипломдан нусха — олий юридик маълумот тўғрисида дипломга эга бўлмаганлар учун;
номзод меҳнат дафтарчасининг белгиланган тартибда тасдиқланган нусхаси ёхуд ундан кўчирма, агар мавжуд бўлса.
Агар номзод хорижда таълим олган бўлса иш берувчи давлат органи ва ташкилотининг муҳри билан аслига тўғрилиги тасдиқланган хорижда ўқишни тамомлаганлик тўғрисидаги ҳужжат ва ушбу ҳужжатнинг Ўзбекистон Республикасидаги ҳужжатга эквивалент деб топилганлиги тўғрисида ваколатли давлат органи томонидан берилган гувоҳноманинг нусхалари тақдим этилади;
Юридик хизмат ходими лавозимига келишиш учун бир ёки ундан ортиқ номзодлар тавсия этилганда, мазкур ҳужжатлар ҳар бир номзод учун алоҳида тақдим этилади.
Давлат органлари ва ташкилотлари томонидан тақдим этилган ҳужжатлар қайтариб берилмайди.
Юридик хизмат ходимини лавозимга тайинлашни келишиш масаласини кўриб чиқишда номзод билан суҳбат ўтказилади.
Суҳбат адлия органларида ташкил этиладиган комиссиялар томонидан ўтказилади.
Юридик хизмат ходимини лавозимга тайинлаш учун ҳужжат топширган номзодларга бериладиган саволлар рўйхати Адлия вазирлигининг расмий веб-сайтида: (http://www.minjust.uz/uz/activity/coordination/98449/) жойлаштирилган.

Тел: 0 (373) 241-75-46

Махсус рухсатномани қаердан олса бўлади

Махсус рухсатнома Тошкент ва Нукус шаҳарлари ҳамда вилоятлар марказларида Давлат хизматлари марказлари томонидан берилади. Махсус рухсатномалар бериш тизими жорий йилнинг 29 март соат 09:00 дан амалиётга жорий этилади.

Махсус рухсатнома Марказга ташриф буюришдан олдин, марказга олдиндан телефон қилиб, маълумотлар оператор томонидан тўлдирилганидан сўнг қабул қилинади.

Аввалдан рўйхатдан ўтмаган юридик ва жисмоний шахсларнинг аризалари кўриб чиқилмайди.

Давлат хизматлари марказлари телефон рақамлари 29 март соат 08:00 да эълон қилинади.

Биринчи навбатда озиқ овқат ва дори-дармон ташувчи юридик шахсларнинг, кейин эса жисмоний шахсларнинг аризалари қабул қилинади.

❗️ Махсус рухсатнома асосида ҳаракатланадиган бошқа автотранспорт воситалари фақатгина ушбу муассаса ва ташкилотлар фаолияти билан боғлиқ ҳолда ҳаракатланишига рухсат берилади. Шахсий манфаат йўлида фойдаланиш қатьиян ман этилади ва тартиб бузилган ҳолатларда қонунчиликда белгиланган тартибда жавобгарликка тортилади.

Ўзбекистон Республикаси Республикаси Нотариал палатасининг 2020 йил 24 мартдаги буйруғи билан Фарғона вилоят Фарғона шаҳар 8-сон давлат нотариал идорасининг нотариуси Сапаев Улуғбек Нуруллаевич Нотариал палатанинг Фарғона вилоят ҳудудий бошқармаси бошлиғи лавозимига тайинланди.

Шунингдек, Фарғона вилоят адлия адлия бошқармаси бошлиғининг 2020 йил 25 мартдаги буйруғига асосан Ўзбекистон Республикаси Республикаси Нотариал палатасининг Фарғона вилоят ҳудудий бошқармаси рўйхатдан ўтказилди.

Фарғона вилоят адлия бошқармаси жамоаси Сапаев Улуғбек Нуруллаевичга келгуси ишларида муваффақиятлар тилайди.

Ўзбекистон Республикаси Адлия вазирлиги ташаббуси билан  Фарғона, Андижон, ва Наманган вилоят адлия бошқармалари ва туман (шаҳар) адлия бўлимлари иштирокида “Адлия органлари фаолиятлари - таҳлил, натижа ва самарадорлик йўлида” мавзусида минтақавий семинари ўтказилди.
Семинарда Ўзбекистон Республикаси Адлия вазирлиги томонидан иш фаолияти ижобий деб топилган туман, шаҳар адлия бўлимларининг иш фаолиятларида амалга оширилаётган самарали натижалари тақдимоти бўлиб ўтди.
Шунингдек, семинар давомида белгиланган вазифаларни бир хилда тизимли амалга оширишни йўлга қўйиш, янги вазифаларни тўғри қўллаш амалиётини ўрганиш, бошқармаларнинг асосий йўналишлари бўйича ижобий амалиётни ўрганиш мақсадида вилоят адлия бошқармаси бўлимларининг самарали натижалари юзасидан ҳам таклифлар алмашилди.